Curaçao Quantum Week 2026

Curaçao Quantum Week 2026 – Despues di un apertura eksitoso i kontribushonnan inspirativo di ekspertonan di quantum na e konferensia di ISACA, e Quantum Safe Training ta na pleno desaroyo. Djamars 10 di novèmber a sigui aktividatnan pa hóben i un presentashon públiko.

WILLEMSTAD – Curaçao Quantum Week 2026 a tuma lugá siman pasá kaminda a brina oportunidat na públiko pa konosé e mundu partikular di quantum. For di un almuerzo privá ku un ‘sous di quantum’ te na un evento públiko ku hopi bishitante: e promé dianan tabata dediká na asombro, enkuentro i e pregunta kiko quantum ta i kiko e por nifiká pa hende, empresa i Kòrsou.

E siman a kuminsá djamars 3 di novèmber na Amazia ku un almuerzo privá pa patrosinadónan i miembronan di e koalishon di Curaçao Quantum Safe Foundation (CQSF). Entre e platonan, e ekspertonan di quantum a kompartí ideanan i perspektivanan tokante un teknologia ku ta bira kada biaha mas relevante pa nos seguridat digital i nos ekonomia di futuro. E ambiente informal a brinda amplio espasio pa pregunta, kombersashon i kontaktonan nobo.

E mesun anochi a sigui e evento públiko di apertura. Despues di e apertura ofisial pa Gwido Jansen na nòmber di Curaçao Quantum Safe Foundation i MEO, Prof. Dr. Christian Schaffner, Dimitri van Esch i Marc Samson a hiba e presentenan riba un biahe fasinante den e mundo di quantum. Esaki a tuma lugá den un sala bon yen ku un públiko variá bou di guia di Heide. Ku ehèmpelnan fásil pa komprondé, perspektivanan sorprendente i e magia di quantum, nan a logra kaptivá e públiko. Mas despues a sigui un brindis i oportunidat pa ‘’networking’’.

Di asombro pa profundisashon

Durante e konferensia di ISACA Curaçao, “Transforming Tomorrow: Practical AI and the Quantum Future”, e presentadónan internashonal di quantum tambe a brinda inspirashon i perspektivanan nobo. E kolaborashon entre ISACA Curaçao i Curaçao Quantum Safe Foundation a resultá den un programa variá ku a kombiná inteligensia artifisial, seguridat sibernétiko i e futuro di quantum.

Riba djabièrnè 6 i djasabra 7 di novèmber a sigui e asina yamá Quantum Safe Training na University of Curaçao (UoC) i den e sentro di data di BlueNap. Durante e entrenamentu intensivo aki, partisipantenan a profundisá nan konosementu di seguridat di quantum, kriptografia post-quantum i preparashon di organisashonnan pa e transishon pa protekshon ku por resistí menasan di quantum. Asina, e siman ta duna un paso konkreto di konsientisashon pa preparashon.

Djamars 10 di novèmber: ta beurt di e siguiente generashon
Pero e siman di quantum no a kaba ainda. Djamars mèrdia 10 di novèmber, QuantumPlay ta riba programa pa hóbennan di 16 aña bai ariba. Durante e mèrdia aki, nan lo siña konosé pensamentu di quantum hungando i ta deskubrí kon kreatividat i quantum ta bini huntu. Informashon pa inskripshon ta na final di e artíkulo aki.

E programa ta inkluí un workshop di QuantumThinking i weganan di quantum ku ta desafia partisipantenan pa pensa di un otro manera, hasi eksperimento i deskubrí posibilidatnan nobo. Tambe nan ta risibí informashon tokante kon nan por gana un biahe di quantum pa Hulanda, pa presentá nan mesun wega di quantum, obra di arte di quantum òf otro idea kreativo relashoná ku quantum. E mèrdia lo mustra ku quantum no ta solamente un tema pa sientífikonan i spesialistanan di IT, sino ku e ta brinda espasio tambe pa kreadónan, gamers, artistanan i talentonan hóben ku kurio­sidat.

Presentashon públiko: quantum i e futuro ekonómiko di Kòrsou
Djamars anochi 10 di novèmber lo tin un presentashon públiko na UoC. No ta nesesario pa tin konosementu tékniko di antemano: ku kurio­sidat so bo por partisipá i deskubrí pakiko quantum ta mere­sé kada biaha mas atenshon.

Banda di un presentashon di quantum fásil pa sigui, lo trata tambe e konekshon ku e Strategia Nashonal di Eksportashon i IT komo di kuater pilá ekonómiko (IT4P) di e Ministerio di Desaroyo Ekonómiko. E punto sentral ta kon desaroyo di konosementu, inovashon digital i kolaborashon internashonal por kontribuí na oportunidatnan ekonómiko nobo pa Kòrsou, entre otro mediante desaroyo di ekspertisio spesialisá i servisio ku por eksportá.

Kolaborashon komo base
Curaçao Quantum Week ta un inisiativa di Curaçao Quantum Safe Foundation i e koalishon di quantum, ku ta konsistí di e Ministerio di Desaroyo Ekonómiko (MEO), Regulatory Authority of Curaçao (RAC), University of Curaçao (UoC) i BlueNap Americas. Ademas, e fundashon ta kolaborá ku e partnernan CITI, TechMeetUps i ISACA. E siman ta bira posibel tambe danki na e patrocinadónan CIFC, CIFA, VBC, Grant Thornton, SITG-Consulting i e Konseho Sosial-Ekonómiko (SER).

Siguiente paso: Caribbean Quantum Week 2027
E éksito di e di dos edishon aki di Curaçao Quantum Week ta motivá pa sigui ku mas. P’esei, Curaçao Quantum Safe Foundation, huntu ku e koalishon di quantum, ya ta trahando riba e preparashonnan pa Caribbean Quantum Week 2027. Ku esaki, nan ke amplia e kolaborashon i envolví profeshonalnan, trahadónan di maneho, institushonnan di enseñansa, empresarionan i hóbennan di otro parti di Karibe tambe den e oportunidatnan i desafionan di teknologia di quantum.

E ambishon komun: di konsientisashon tokante quantum pa preparashon pa e era di quantum.

Mas informashon: www.curacaoquantum.com
Inskripshon pa QuantumPlay: shop.tickets.cw/quantum-play-next-generation

Nota pa redakshon
Pa mas informashon:
Gwido Jansen, presidente di Curaçao Quantum Safe Foundation
info@curacaoquantum.com