CTA entrega informe anual na Ministerio di Hustisia

Willemstad – Ministerio di Hustisia a risibí atrobe e informe anual di Komishon di Supervishon di Kuido di Detenidonan (CTA). Sekretario General interino, señora Gimena van der Gen, a risibí e informe for di presidente di CTA, señora Maritza Becher i sr. Reagan Celestijn.

Durante e reunion a presta atenshon na e konstatashonnan i puntonan di atenshon ku ta sali dilanti den e informe anual. Ademas, tabatin un interkambio konstruktivo di opinion tokante e situashon aktual den kuido di detenidonan i e posibilidatnan pa sigui mehorá e kalidat, e forma di traha i e proseso nan.

E kombersashon a brinda espasio pa kompartí eksperensia i konosementu, i pa huntu mira kua mehorashonnan por realisá den futuro. Den esaki, kuido, trato digno i profesionalismo ta keda punto di salida importante den e atenshon na personanan ku ta privá di nan libertat.

Ministerio di Hustisia ta duna hopi balor na e funshon independiente di supervishon di CTA i ta konsiderá e rekomendashonnan i konstatashonnan den e informe anual komo un kontribushon balioso pa sigui desaroyá i mehorá e kuido di detenidonan na Kòrsou.

E ministerio ta ekspresá su apresiashon pa e dedikashon i kompromiso di e komishon, i ta enfatisá e importansia di un diálogo kontinuo i di un bon kolaborashon den e kadena di hustisia.

Potrèt di entrega informe anual