Presentacion di buki titula “Mi no ta gordo” na Biblioteca
Presentacion di buki titula “Mi no ta gordo” na Biblioteca
ORANJESTAD – Diaranson dia 25 di november 2026 autor y poeta sra. Desiree Correa ta presenta un buki pa mucha titula ‘Mi no ta gordo’ na Biblioteca Nacional Aruba.
E presentacion ta tuma luga di 5.30 pa 6.30 PM.
E buki aki ta skirbi pa poeta y autor Sra. Desiree Correa. Sra. Desiree Correa tin un trayectorio estableci den scena literario. Publicacion tabata na encargo di Sra. Denise de Jongh-Rekwest di Request Publishing (Boneiro). E buki aki ta un ‘voorleesboek’ pa mucha di creche y tambe pa e mucha cu por lesa nan mes, te cu 9 aña. ‘Mi no ta gordo’ ta trata e tema di inclusividad. Cada ken ta diferente y tin su parti fuerte.
“Den un mondi masha grandi mes ta biba un olifante. Su nomber ta Gordy. Gordy ta un olifante cu gusta hunga. Specialmente den un mondi asina grandi, e por hunga tur sorto di wega. E ke hunga cu un amigo, pero cu ken? E ta haya un amigo pa hunga cu ne? Ken lo ke hunga cu Gordy Olifante?”
Desiree Correa, naci na Aruba, tin un trayectorio largo den mundo literario. Banda di tin varios titulo riba su nomber cu su obranan, tambe e tin obranan di teatro, tanto pa mucha, hoben como pa hende grandi. Sra. Correa ta docente y Contado di storia. Den su tempo liber e ta haci hopi traduccion y naturalmente e ta sigui cu e pasion di su bida, cu ta skirbimento. Un di e titulonan mas conoci di sra. Desiree Correa ta ‘Mosa’s eiland’, cu por defini como un klassieker y tambe ‘Manuel’. Biblioteca tin hopi buki di sra. Correa den su coleccion.
Request Publishing hunto cu sponsor Divi Impact Foundation ta haci donacion di e buki aki na tur scol basico na Aruba, Traimerdia, Imelda Hof y Biblioteca Nacional Aruba. Cera conoci cu Gordy, nos olifanti chikito cu kier ta bo amigo!


