Minister Camelia-Römer ta duna òrdu pa kampaña di informashon tokante roinan na Kòrsou

Minister Camelia-Römer ta duna òrdu pa kampaña di informashon tokante roinan na Kòrsou

Willemstad- Ministerio di Tráfiko, Transporte i Planifikashon Urbano ta kuminsá un kampaña di informashon fuerte pa eduká tokante mantenshon di roi. Den e dianan ku a pasa a sali na kla ku komunidat di Kòrsou no ta sufisiente na altura di e importansha di roinan limpi, komo parti di e ret di desague di awa. E falta di konosementu aki por a okashoná hopi daño na pertenensia di individuonan i na infrastruktura di Kòrsou, i asta kousa víktima, si di bèrdat orkan Matthew lo a pasa nos isla.

Roinan limpi ta roinan sin shushi doméstiko, sin kùp, bòter, baki foam, bruki di beibi i sigur sin frishidèr, pochi wc, kashi paña bieu, tayer di outo i otro opheto ku por blòkia e bokanan di e roinan pa pasa e fluho di awa. Palunan i vegetashon den un roi simplemente por snui pa nan no stroba bista, pero no ta eseinan ta blòkia awa pa pasa dor di e sistema. Vegetashon ta yuda trankilisá e fluho di awa, pa e awa no bai muchu duru i lihé den e bokanan loke tambe por sòru pa problema.

Bon funshonamentu di roinan di Kòrsou ta den man di Gobièrnu i di komunidat mes. Minister Suzy Camelia-Romer di Tráfiko, Transporte i Planifikashon Urbano i Obra Públiko a disidí ku trabounan di limpiesa na roinan i bokanan di roi ta sigui. Mas trempan den e aña aki, a limpia roinan na Kòrsou, pero a konstatá dor di e tantísimo yamada i pedido ku a drenta via e numbernan de emergensia ku OW a pone disponibel, ku tin sufisiente trabou adishonal pa hasi ainda.

Ta urgi públiko pa yama polis ora ta mira hende tira shushi i potoshi den roinan di Kòrsou. Nan ta kastigabel segun nos leinan. Ora tin problema ku awa no por sigui pasa den roinan i bokanan di roi, por yama Obra Públiko pa bin solushoná esaki.

MINISTERIO DI TRANSPORTE TRAFIKO PLANIFIKASHON URBANO KORSOU

This site uses Akismet to reduce spam. Learn how your comment data is processed.

error: Content is protected !!
%d bloggers like this: