FUNDASHON BOS DI HUBENTUT

Durante un rueda di prensa Fundashon Bos di Hubentut (FBH), Federatie Antilliaanse Jeugdzorg (FAJ), Fundashon Ban Komuniká (FBK) I Fundashon Material pa Skol (FMS) a duna informashon di tur e aktividatnan ku konhuntamente nan ta bai organisá.
E aktividatnan aki ta wòrdu organisá en konekshon ku Dia Internashonal di Derechi di Mucha ku ta 20 di Novèmber i tambe Dia Internashonal pa Kombatí Violensha Kontra Hende Muhé i Mucha Muhé ku ta 25 di Novèmber.
Un di e aktividatnan ku lo tuma lugá dia 17 i 18 di Novèmber ta bishitá skolnan ku profeshonalnan. Nos lo bishitá 8 skol di diferente direktiva di skol i di diferente region na Kòrsou. E skolnan ku nos ta bai bishitá ta:

1. Kolegio Don Sarto
2. Kolegio San Hose
3. MC Piar
4. Nelly Winkel
5. Blenchi
6. Kolegio Bellefaas Martis
7. JWTH Schotborg
8. Marieta Alberto

– E profeshonalnan lo papia ku e muchanan di siklo 2 tokante nan derechinan básiko i lo elaborá riba e derechi(nan) ku ta relatá na nan profeshon.
– E profeshonalnan ta bini di diferente sektor laboral.
– E meta di e aktividat aki ta pa pone atenshon riba e deber i derechi di e mucha, motivá e muchanan pa papia tokante nan derechinan i tambe pa nan por mira e konekshon entre deber i derechi den práktika.

En konekshon ku dia Internashonal pa Kombatí Violensha Kontra Hende Muhé i Mucha Muhé nos tin un konferensha ku yama “Let’s Talk” dia 27 di Novèmber .
E konferensha aki ta speshal pa e hende muhé ku ta mama i su yu muhé. Esaki ta pa stimulá e komunikashon entre e mama i su yu muhé. Lo bai stimulá e mama i su yu pa interkambiá pensamentu riba diferente tópiko sumamente interesante. E kontribushon pa e konferensha pa mama ku yu ta 25 florin i e ta tuma lugá na Renaissance di 14:00 pa 19:00. Karchi ta optenibel na Fundashon Bos di Hubentut i na Mensings Kaminada.

Dia 4 di Desèmber lo bai tin un Debate i Speechkontest .
Hóbennan di 12 pa 25 aña lo bai debatí i tambe tira speech. Tur esaki den kuadro di e Dia Internashonal di Derechi di Mucha. E hóbennan lo bai debatí i tene nan speech tokante derechi di mucha. E aktividat aki lo tuma lugá na WTC di 16:00 pa 22:00.
Entrada ta grátis, pero mester buska karchi na Fundashon Bos di Hubentut.
Den e siman di 5 di Desèmber te ku 9 di Desèmber lo bai tin un eksposishon na Biblioteka Públiko.

Bin I sostené nos hóbennan durante e aktividatnan
Pa informashon por tuma kontakto ku nos .

Persona di kontakto :
Relashonista Públiko FBH/KGS Jeanella Wall
Telefón: 4622442, 4618103, 6834118