DUANA KU MANEHO NOBO PA DEKLARÁ PAKETE PERSONAL

DUANA KU MANEHO NOBO PA DEKLARÁ PAKETE PERSONAL
Willemstad- Entrante 1 di desèmber próksimo Duana Kòrsou ta adaptá su maneho di deklarashon pa pakete ku un persona ta eksportá pa un otro persona. Konforme artíkulo 46 di Landsverordening tarief invoerrechten (LVTI) un partikular ku manda pakete ku kontenido pa un otro partikular na Kòrsou por haña eksonerashon pa derecho riba importashon basta e ta kumpli ku e kondishonnan stipulá den lei. Segun e maneho nobo entrante e fecha menshoná mester deklará tur pakete ku un partikular a manda pa otro partikular via e sistema digital Asycuda. 
Asycuda ta e sistema outomatisá di Duana ku ta registrá, monitoriá i kontrolá e.o. karga for di momentu ku esaki subi barku òf avion pa drenta òf sali Kòrsou te na e momentu ku e destinario (esun ku ta risibí e karga) risibí su karga. 
Si e pakete ku un partikular a manda pa un otro partikular ta kai bou di e siguiente kategorianan e ta bini na remarke pa eksonerashon riba derecho di importashon. E pakete mester tin un karakter insidental, e kontenido di pakete tin merkansia/produkto eksklusivo personal (no komersial), ta di un remitente (esun ku ta manda e pakete) pa e destinatario sin ku e delaster aki mester paga pa e produktonan. E di kuater kondishon ta ku e balor di e kontenido no ta surpasá NAF. 125,00, entre nan e balor di produktonan alkohóliko, tabako i produktonan di tabako, perfume i Eau De Toilette, kòfi i te i tambe esensia i ekstrakto di esakinan, pa kada un limitá na e kantidat, peso i porsentahe stipulá pa lei. Pa mas informashon di e limitashon aki por konsultá e website di Duana http://www.douane.cw 
E kompania ku ta atendé e pakete (expediteur) òf e persona òf organisashon ku ta deklará e pakete ora esaki yega Kòrsou ta responsabel pa averiguá si e kontenido di e pakete ta kumpli ku e kondishonnan di eksonerashon. E ta responsabel tambe pa e deklarashon ta korekto. Pa e paketenan ku no ta bini na remarke pa eksonerashon e prosedura pa pago di impuesto riba di importashon di karga ta konta. 
Dor di kòntròl di e fluho di merkansia, stipulashon di debe i kobransa di derecho di importashon Duana ta duna un kontribushon efektivo na e (fluho di) entrada di Kòrsou, nos desaroyo ekonómiko, seguridat, medio ambiente i salubridat públiko. Pa Duana pues ta importante pa e por tin un bista riba tur karga ku ta drenta Kòrsou sea ku ta unu personal òf komersial. Pa e motibu aki Duana ta pidi tur expediteur, kompania i persona ku ta atendé ku karga pa tene bon kuenta ku e maneho nobo aki. Den kaso ku e deklarashon no ta korekto Duana lo apliká e maneho di but.  

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: