Ana Maria Pauletta: ‘plan di kontingensia ‘Gang”
Na: Presidente di Parlamento di Curaçao
Sr. William Millerson
Wilhelminaplein 4
Presente.
Willemstad, 02 òktober 2019
Tópiko: deliberashon tokante e plan di kontingensia pa ku atendé ku gruponan kriminal organisá ‘Gang’.
Apresiabel sr. Presidente,
Pa medio di e karta aki suskrito ta pidi bo persona pa konvoká un “Senioren Convent” segun artíkulo 12 di nos Reglamentu di Orden, pa haña informashon di Gobièrnu tokante e situashon di ‘Gang’ na Kòrsou.
E patronchi di kresementu di gruponan kriminal organisá i nan partisipashon den aktonan kriminal ta alarmante. Komo ehèmpel nos por menshoná kasonan di likidashon, asosiá ku e mundu kriminal, kaminda personanan inosente ta sali herida. Ademas por mira un oumento den kasonan di atrako den kas riba grandinan. Den kuadro di esaki den pasado a laga traha rapòrtnan ku no a duna masha aklarashon riba e posishon di e gruponan aki den nos komunidat i tampoko nan funshonamentu.
E ‘Gang’ ta reklutá hóbennan yòn, pa drenta den nan organisashon kriminal. I una bes aden e hóbennan tin difikultat pa sali for di e bida aki. E hóbennan ta keda influensia pa kometé aktonan kastigabel, ku promesanan di hopi sèn i protekshon personal.
E gruponan aki mas i mas ta yega mas serka di nos skolnan. No solamente nan miembronan ta asistí na nos skolnan, pero tambe nan ta yega portanan di skol pa atendé nan negoshinan kriminal. E gruponan aki ta yega mas i mas serka di nos famianan, kaminda atrako ku violensia ta tuma lugá den nos kasnan i den lugánan públiko.
E konteksto di gruponan kriminal organisá ta unu sumamente delikado. Pa e motibu nan aki frakshon di PAR ta pidi un reunion di Senioren Convent, pa trata e tema ku e privasidat nesesario, pa di ningun forma perhudiká investigashonnan andando. Pero ta importante ku Parlamento komo órgano demokrátiko ta deliberá ku Minister di Hustisia sr. Girigorie riba e tópiko aki. Mi ta spera ku demas frakshonnan di Parlamento tambe ta mira e importansia di e tema aki.
Atentamente,
Ana Maria Pauletta
