PS-PAR-PAIS,PNP i (Partido MAN den silensio) ta mara awe Kòrsou na dil di 40 aña den tur sekresia

PS-PAR-PAIS,PNP i (Partido MAN den silensio) ta mara awe Kòrsou na dil di 40 aña den tur sekresia
Refineria di Kòrsou komprometé porta sera awe den Konseho di Minister

Kòrsou ta wòrdu bende pa un gobièrnu demishonario, sin niun klase di transparensha, poniendo interes polítiko partidista dilanti na lugá di interes nashonal di nos pueblo. Awe a kai den brievenbùs di MFK e kontrato ku tabata plania pa awe gabinete Whiteman, por sierto demishonario firma ku e grupo Chines (GZE) ku kual nan a firma un MoU na 15 di sèptèmber 2016.

Negoshashon pa hür un refineria i pone nos kompanianan estatal tambe forma parti di kontrato, no ta algu ku por tuma lugá di anochi pa mainta, kaminda un gobièrnu demishonario ta bai hipoteká partinan hopi importante di nos patrimonio ku un kompania chines pa 40 aña.

Den e kontrato ku lo mester a wòrdu firma awe tin tur kos deskribí ku e kompania chines ta deseá;

– Kontrato pa un periodo di 40 aña
– Eksonerashon di diferente belasting
– Fasilidat dor di SOAW pa importá trahadó
– Entrega eksklusivo di LNG gas
– Diferente kontrato ku e kompania chines mester firma ku Curoil, Aqualectra, Selikor, CPA i kompania di Tou Kòrsou

Esaki ta indiká ku pa 40 aña ta bai pone Kòrsou kompletu den man di e kompania chines aki.

Sinembargo un análisis preeliminar den e kontrato aki no por lesa kiko a regla pa Kòrsou, despues ku firma e kontrato aki kaminda ta menshoná tur loke ta na fabor di e kompania Chines, e ora ei ta bai drenta den Negoshashon pa definí e interes nan di Kòrsou, esaki despues ku ya nos patrimonio ta komprometé/bende.

Den e kontrato aki ta menshoná, PDVSA komo un posibel partner di e grupo Chines, ironia ta ku na final di e kontrato ta RDK ta konsehá e kompania Chines pa drenta den un aliansa ku PDVSA pa tin sinergia pa manehá e refineria debí ku ya PDVSA tin eksperensia den maneho di e refineria.

Poniendo tur webu den un makutu ta e kos di mas malu ku por tuma lugá. Dunando e kompania Chines nos refineria pa 40 aña i huntu ku esei ta mara tur nos kompanianan petrolero i otronan manera Selikor ku tambe por produsí koriente dor di kima sushi den e kontrato, ta algu sumamente peligroso pa nos futuro.

Ta parse ku partido MAN kual ta e partido ku ta bai karga signatura di e próksimo gobièrnu ta di akuerdo pa nos dushi Kòrsou wòrdu bende di e forma aki i ta sinta ku nan man nan krusa i laga un gobièrnu demishonario tuma desishon nan ku ta mara nos i nos futuro generashon den un situashon sumamente peligroso. Esaki ta e preludio di e gobièrnu sosial ku nos ta bai haña serka partido MAN.

Pueblo di Kòrsou esaki si no por, nos no por entrega gran parti di nos patrimonio nashonal pa 40 aña mientras un gobièrno demishonario ku ta sigui en gran parte pa 4 aña mas porta sera ta negosha esaki den tur sekresia. MFK ta alerta i ta keda na nos komo Pueblo pa protesta i protehá nos Refineria i kompanianan petrolero.

Gerrit F. Schotte
Lider di Frakshon di MFK