Curoil su Show Musikal di Pasku “ pa chikí i grandi disfrutá”

Curoil su Show Musikal di Pasku “ pa chikí i grandi disfrutá”

Willemstad – Tur aña di nobo e tradishon di Curoil pa sendementu di lus di temporada di fin di aña kombiná ku un tremendo show musikal, ta hala atenshon di henter komunidat. Despues ku aña pasá tabatin un show grandi, e aña aki, ta ku sumo plaser Curoil ta trese atrobe un show di taya pa asina gradisí pueblo di Kòrsou pa e sosten risibí durante aña 2016.

E aña aki, Curoil a buska un elenko di artista ku lo hasi nan debut den e show musikal di Curoil, pues, esaki ta un era nobo di promové nos artistanan. P’esei Curoil ta invitá pueblo di Kòrsou pa bin selebrá i pasa un anochi agradabel huntu ku Curoil i tur e artistanan di taya ku lo presentá.

E anochi di show musikal di Curoil ta trese i krea un ambiente festivo pa chikí i grandi i lo tin presentashon pa tur generashon. Entrante 6or di atardi lo kuminsá ku presentashon di e muchanan di C.Y.M.F. (Cross Over Youth Music Foundation), kual ta e skol di músika di Roy “Toni” Worrell. Despues e programa ta kontinuá ku Cross Over Gospel Choir i djis despues di sende e lusnan bunita ku ta iluminá e edifisio di Curoil, lo sigui un tremendo show musikal ku algun di Kòrsou su mihó artistanan kual ta: Jouly Bridgewater, Yumarya Grijt, Kadir Snijder, front di Gentz, Jeon for di Aruba i Leslie Vos for di Hulanda. Tur e artistanan aki lo keda kompañá pa e All Star Band bou di direkshon di Hershel Rosario.

Djadumingu 11 di desèmber próksimo pa 6or di anochi, Curoil ta warda un i tur pa disfrutá di un show spektakular, bunita i inspirativo komo muestra di apresio i gradesimentu na pueblo di Korsou.