Mega BBQ pa NKBB projekto S.O.S. United Nations
Mega BBQ pa NKBB projekto S.O.S. United Nations
Kralendijk Bonaire: Den kuadro di e lucha hustifiká pa logra pone Boneiru riba e lista di teritorionan sin propio gobernashon, un grupo di boluntario a organisá djadumingo 4 di dézèmber último un MEGA BBQ.
Esaki a resultá den un éksito kompleto grasias na kolaborashon di e famia di Nos Kier Boneiru Bek ku ta kresiendo.
Kordinashon di e Mega BBQ tabata den man di Frank Goeloe i Eric “Topo” Delannoy ku nan ekipo di grill i ekipo di saka kuminda. Un danki na Anibel Clarenda ku a fungi komo “runner” entre esnan ku ta grill i esnan ku mester a saka kuminda. E karni a keda prepará pa Iby Emerenciana di Carniceria Latino, miéntras ku kordinashon di benta di karchi i atministrashon finansiero tabata den man di Nòchi Willem. Un danki tambe na Richie Pietersz i su crew ku a atendé e bar pa bishitantenan por a freska e garganta.
E éksito lo no tabata kompleto sin e ayudo boluntario di Radionan Live 99 i Voz di Boneiru ku Tio Roli pa promoshon di e evento. Tambe a kontribuí komo puntonan di benta Carniceria Latino, Fruteria Shelly’s, E Teras, Boutique Vita, Divi Bar restorant, Chago Melaan i su señora, Sharisse di Kaya Shoshori na Rincon i tambe Eddy Christiaan, Leny Janga, Eric Soleano, Robert Statie, Glen Albertina i tambe Vicky Bissesar i James Finies.
E lista lo no ta kompleto si nos no gradisí e 419 siudadanonan ku a kumpra un karchi i por a saboreá di un sukulento i sabroso BBQ. Nos kier yama danki tambe na tur esnan ku a yama felisitá pa e organisashon di djadumingo ku a kana zetá.
Traha den UNION a bolbe demonstrá ku por logra kosnan grandi. Tin mas evento grandi na kaminda i nos ta konta ku e famia di Nos Kier Boneiru Bek lo sigui krese pa nos realisá e proyekto di pone Boneiru riba e lista di teritorionan sin propio gobernashon.
Derecho di outodeterminashon ta un derecho úniko i eksklusivo di e pueblo Boneriano i ta e pueblo lo kargu’é i realisé i nos komo pueblo den UNION lo demonstrá ku nos lo sali viktorioso.
Nos ta manda un invitashon na tur suidadanonan, organisashonan o gruponan di nos komunidat ku kier organisa eventonan similar pa por tuma kontakto ku nos na email: jamesfinies@gmail.com o cell: 782 5664
James Finies, Nos Ke Boneiru Bek
