GARANTIA PA UN KUIDO STABIL TA UN OPSHON, UN DESISHON OF E TA PRIORIDAT ?

Jacinta Constancia den presupuesto 2017 kapítulo Salubridat Públiko:

GARANTIA PA UN KUIDO STABIL TA UN OPSHON, UN DESISHON OF E TA PRIORIDAT ?

Sra. Jacinta Constancia, parlamentario pa frakshon di Movementu Futuro Kòrsou (MFK) ta hopi preokupá ku e situashon den e sektor di kuido. Sra. Jacinta Constancia ta di opinion ku tanten gobièrnu kere ku ta mas bewaker, mas polis, mas kámara, mas pistol, mas regla, mas lei i mas medida fiskal ta e solushon pa nos Kòrsou, nos ta keda gasta mas plaka i na final haña resultado mes òf mas pió pa Kòrsou.

Mi ta di opinion ku un kuido na nivel mester ta e prioridat pa kualke gobièrnu ku ta respetá su mes. Ningun gobièrnu ku ta respetá ser humano, no mag di aprobá i/òf bai di akuerdo ku medidanan fiskal ku e úniko preteksto paso segunnan no tin sèn, esaki ta inkonsebible i ta loke nos ta mira sosodé tur dia di nobo pa e sektor di kuido, esaki ta un bèrgwensa nashonal. Ku no bin kambio den e forma pa atendé ku kuido, nos ta pèrdè tur ekpertisio i kapasidat di nos ekspertonan ku lo kue nan bulchi bai i buska otro trabou otro kaminda.

E Ministerio di Salu Públiko ku tin di ofresé un kuido na nivel na pueblo di Kòrsou no ta gosa di un fasilidatnan adekuá, e falta di ekspertonan kapasitá pa por kontrolá e servisio ku organisashon ku ta bende kuido ta laga hopi di deseá.

Nos ekspertonan bon ekipá ku te ainda tei pa duna un servisio médiko na nivel ta mal fada i no ta aseptá pa sigui bati nan ku mas medidanan fiskal. Falta di vishon i madures polítiko pa manehá kuido i tuma desishon ku e prioridat nesesario pa garantisá salú di nos poblashon no ta visibel.

Awe nos tin desishonnan ku ta perhudiká e organisashon/entidatnan ku tin di ofresé/bende kuido manera, spesialistanan, botikanan, klínikanan, kasnan di ansiano, “verpleeghuizen”, “tehuizen”, ta konstantemente den problema finansiero, pasobra gobièrnu ta preferá di pone bida di hende riba e mesun nivel ku un “slager” den karniseria ta pone e karni pa kòrta riba tonbank. No tin sufisiente trayekto preventivo, tiki komprenshon humano dor di gobièrnu, ta wak plaka riba salú i ta wak lei riba bienestar humano, esaki ta minimalisá demokrasia real.

Oumento di vírus di Dengue, Chinkungunya, Zika, abitantenan ku ta sufri di problema di kurason, preshon, diabétiko, kanser, amputashon, sobr’e peso, ta danki awe na skarsedat di servisio adekuá i remedi apropiá, tur esaki ta tópiko di dia. Komo si fuera no ta basta sushedat, polushon, damnan den mal estado i/òf kibra rònt Kòrsou ta kontribuí na mas malesa i problema.

Sra. Jacinta Contancia parlamentario pa MFK ta finalisá i ta ripití tanten ku gobièrnu kere ku ta mas bewaker, polis, pistol, kámara, mas regla, mas lei, mas medida fiskal ta e solushon pa nos Kòrsou, nos ta keda gasta mas plaka i i na final haña resultado mes òf mas pió pa nos dushi Kòrsou.

Na nòmber di Frakshon di MFK

Sra. Jacinta Constancia
Miembro di Parlamento (MFK)
jacinta-constancia-2016

This site uses Akismet to reduce spam. Learn how your comment data is processed.

error: Content is protected !!
%d bloggers like this: