Advertisements

Ku un rèkòrt personal nobo e ta marka historia pa Korsou Banco di Caribe ta felisitá Tiareth Cijntje ku su prestashon na Canada

Ku un rèkòrt personal nobo e ta marka historia pa Korsou Banco di Caribe ta felisitá Tiareth Cijntje ku su prestashon na Canada

WILLEMSTAD: Tabata djárason mèrdia ku Tiareth a bishitá Banco di Caribe riba invitashon di e tim di maneho. Sr. Fons Simon, CEO di e banko a ekspresá di ta mashá kontentu di por risibí e hóben di apénas 15 aña di edat den su despacho. “Tiareth mester ta un estímulo pa otro hóbennan. E ta personifiká disiplina i perseveransia; ingredientenan ku nos tin mester pa avansá den bida. Na un edat hóben, Tiareth ta marka historia pa Kòrsou i nos ta orguyoso di esei. Nos ta felisitá su mayornan tambe pa e estímulo kontinuo i dedikashon na Tiareth, ku esei tambe ta masha importante pa kualke yu ku ta praktiká deporte.”

Tiareth Cijntje awor tin e rèkòrt nashonal riba 100m ‘rugslag’, esaki ta 0.11 sekònde mas lihé ku e tempu di Petra Bekaert ken tabata tin e rèkòrt na Kòrsou. Kabando su ‘rugslag’ den 1.08.50 minüt, Tiareth Cijntje ta marka historia i esaki ku apénas 15 aña. Ta trata di un hóben ku a kuminsá praktiká natashon ku 6 aña di edat i awendia ta esun di mas hóben den su ekipo. E eksperensia di Tiareth na Canada sigur ta un paréntesis pa e hóben,”Mi a pasa hopi great, tabata promé biaha ku mi a mira sneu. Mi no tabata sá mes ku mi a kibra e rèkòrt nashonal, te ora mi coach a kuminsá grita di alegria. Ora finalmente mi a realisá, mi tabata mashá kontentu! ”Mas aleu Tiareth ta konta di a risibí un kaluroso bon biní serka su kompañeronan na skol. Además sali riba portada di korant a koroná tur mi esfuerso. “Mi meta ta, pa den 2017 mi partisipá na e Kampionato Mundial na Hungria i pa na 2020 mi yega weganan olímpiko na Hapon.” Mama di Tiareth, sra. Fharitza Sophia, empleá na Banco di Caribe, a gradisí tur presente djárason mèrdia, “Nos ta gradisí Dios na promé lugá. Un danki tambe na Federashon Akuátiko Kòrsou (FAK) pa duna nos yu e oportunidat di partisipá na e Kampionato Mundial di Natashon Fédération Internationale de Natation (FINA) na Canada. Nos ta hopi orguyoso. Danki tambe na coach Reginaldo Brizuela Gonzales i Julien Paula pa nan guia i dedikashon.”

E prestashon di Tiareth Cijntje na Windsor, Canada no por pasa sin mas. Banco di Caribe ke motivá otro hóbennan pa tuma ehèmpel di Tiareth su dedikashon na e deporte. Durante di su bishita na banko djárason mèrdia, Tiareth a risibí un MultiCard di $250 di man di Fons Simon. Masha Pabien!
dsc_6880

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: