Maduro & Curiels Bank 100 aña di historia i kontribushon na ekonomia di Kòrsou MFK ta felisitá gerensia, empleadonan i tambe tur penshonado

Na: Gerensha di Maduro & Curiels Bank
Plaza Jojo Correa
PRESENTE

Willemstad, 14 di desèmber 2016

Apresiabel Sr. Chicu Capriles,

Movementu Futuro Kòrsou (MFK), ta uni su mes na pueblo di Kòrsou i kier felisitá Maduro & Curilels Bank (MCB) ku selebrashon di su 100 aniversario.

Durante di e 100 aña nan ku a transkurí, MCB a marka historia den e buki di akontesimentunan di nos dushi Kòrsou, bosnan a demonstrá ku no solamente bosnan ta kapas pa manehá un banko, pero tambe bosnan a demonstrá kon ta integrá MCB pa e ta parti di e komunidat multi-kultural ku ta habitá na Kòrsou.

Nos di MFK ta sinti nos honra di por ta aktivo den polítika, pa asina duna un kontribushon na maneho di nos dushi Kòrsou, pero tambe di sa ku nos Kòrsou ta dispone di un banko manera MCB ku ta un kompania sólido i ta un di nos djamantenan ekonómiko i finansiero.

Bosnan a demonstrá durante di e 100 añanan ku a transkurí ku boso empleadonan ta mes importante ku e klientenan ku tur dia di nobo ta presentá na MCB pa hasi negoshi. Nos ta eksperensia kada bes ku nos bishita MCB, empleadonan bon motivá i entrená, pero ku un dosis haltu di duna servisio i pa konvensé e klientela ku skohe pa MCB ta skohe pa kalidat.

Danki pa durante di e añanan ku a transkurí bosnan a implementá teknologia moderno ku ta fasilitá boso klientela akseso mas direkto i rápido na servisionan bankario ku MCB ta ofresé. Tur esaki sin a afektá e relashon personal i kaluroso ku semper bosnan a ofresé na nos komo kliente.

Nos ta sumamente orguyoso di e base sólido ku bosnan a pone pa MCB na promé lugá i pa Kòrsou tambe kaminda nos tin un banko ku no ta baha kabes pa ningun banko den eksterior i nos ta sigur ku selebrashon di e próksimo añanan ku ta sigui kaminda e generashon di relevo tin ku tuma over ku MCB lo kontinuá na konstruí na ekselensia i na un MCB muchu mas moderno, pero semper kumpliendo ku regla i normanan.

Nos di MFK kier felisitá hunta di komisariado, gerensia, personal i tur penshonado di MCB ku boso i nos 100 aña di aniversario, Pabien i ban pa e próksimo 100 añanan ku ta bin, pasombra MCB tei pa keda.

Na nòmber di direktiva di MFK

Dr. Dorothy Pietersz-Janga Gerrit Schotte
Presidente Lider Politiko

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: