INOUGURASHON OFISIAL ‘ORTHOPEDAGOGISCH DAGCENTRUM SENTRO MIA BREMMERS’ (ODC)

inougurashon-ofisial-orthopedagogisch-dagcentrum-sentro-mia-bremmers-odc

INOUGURASHON OFISIAL ‘ORTHOPEDAGOGISCH DAGCENTRUM SENTRO MIA BREMMERS’ (ODC)

Den un ambiente festivo i di habrimentu di regalo, De SGR-Groep – Fundashon Verriet, a inougurá ofisialmente e sentro di pasadia ortopedagógiko: Sentro Mia Bremmers na Salsbachweg. Di un forma mashá emoshonante muchanan kompañá pa nan famia i lidernan di pasadia, tim di maneho di SGR-Groep i invitadonan spesial a presensiá desvelo di e nòmber di e sentro, ku ta karga e nòmber ‘Orthopedagogisch Dagcentrum Mia Bremmers’ (ODC). Despues di e seremonia ofisial, presentenan a risibí un paseo den e sentro pa sera konosí i e muchanan por a disfrutá di algun entretenimentu.

De SGR-Groep – Fundashon Verriet a duna e instituto di pasadia ortopedagógiko e nòmber Mia Bremmers, pa duna honor i rekonosementu na zùster Mia Bremmers, kende tabata direktora di e Instituto MGR. P. I Verriet for di 1961 te ku 1986, na momentu ku el a baha ku penshun. Pa 25 aña largu zùster Bremmer a duna un kontribushon balioso na desaroyo di kuido pa personanan desabilitá, na e konhunto di pais ku e tempu ei tabata karga e nòmber Antia Hulandes.

‘Ortopedagogisch Dagcentrum Sentro 0Mia Bremmers’ (ODC)
ODC ta un sentro di pasadia ortopedagógiko pa muchanan te ku 18 aña. E sentro a originá for di un fushon di diferente grupo di pasadia eksistente. Na total e sentro tin 46 kliente, salí for di e sentronan di pasadia Dolfijn, Purunchi i MOZ. ODC tin diferente tipo di kliente, tin muchanan ku desabilidat mental, muchanan ku desabilidat multiple i tambe tin muchanan outista. E grupo di peuter terapeútiko TPG ku ta pertenesé na e Sentro di Revalidashon tambe ta situá den ODC. Pa guia e klientenan na ODC tin 16 guia/lider di aktividat ta traha bou di guia di unitleider, señora Xiomara Hooten. E guianan di e gruponan ta wòrdu sostené pa un tim multidisiplinario ku ta konsistí di ekspertonan di komportashon, guia di programa, logopedista, ergoterapeuta i fisioterapeuta.

Lokalidat ODC
E sentro di pasadia ta situá den un edifisio renobá, for di mas o ménos mitar di aña 2016. E edifisio kaminda ODC ta situá, originalmente ta e edifisio kaminda e Instito Mgr. P.I. Verriet tabata situá. E edifisio aki a wòrdu konstruí na aña 1949. E tempu ei el a wòrdu diseñá pa e famoso arkitekto Gerrit Rietveld. Na inisio e edifisio tabata un bibienda pa muchanan ku desabilidat físiko. Pero despues e ínstituto tabata permití ku personanan adulto tambe por a biba einan. Na 2004 Instituto Verriet a uni ku ‘de Stichting Zorg voor Verstandelijk Gehandicapten’ i a bira e instituto ku aktualmente nos konosé komo ‘De SGR-Groep’, di kua Fundashon Verriet ta forma parti. Den transkurso di tempu, despues di diferente kambio i desaroyo ‘De SGR-Groep’ a tuma e desishon pa renobá e edifisio i apunt’é komo e lokalidat pa e sentro di pasadia ortopedagógiko pa mucha. Den e renobashon di e edifisio a tene kuenta i duna hopi rèspèt pa e arkitektektura original di señor Gerrit Rietveld. Asina por mira na e kolónan di e murayanan parti pafó, ku nan ta mesun koló ku e murayanan original. E diferente kolónan ku a wòrdu inkluí for di inisio, ta duna e edifisio un aksènt hubenil partikular i ta hasi e sentro realmente unu pa mucha ku un aparensia alegre.

Fasilidatnan di Sentro Mia Bremmers
ODC tin diferente sala grandi airekondishoná spesialmente destiná pa e gruponan di pasadia. E salanan ta ekipá ku materialnan ku ta adekuá pa mucha. Den e salanan spesialmente pa muchanan ku tin desabilidat multiple, tin un sorto di podio kaminda tin un tipo di kama spesial na unda muchanan por drumi i lora manera nan ke na un forma sigur. Riba e tereno di e sentro tin un sorto di espasio integrá sensórik (‘sensorische integratie ruimte’), ku ta parse manera un sala di ehersisio grandi ku tur sorto di material pa hasi ehersisio. Tambe tin un espasio pa ‘snoezel’. Den e kurá parti paden tin un espasio pa rekreashon, patio pa kana i tambe un vèlt pa hunga ariba. Pa e tim multidisiplinario tin espasionan pa hasi tèst i tratamentu. Ademas tin un sala di internèt, espasio pa kantor i un sala pa reuní. Pa konkluí, e sentro ta disponé di un kantina moderno pa e personal i bishitantenan.

Balor di Sentro Mia Bremmers
Sentro Mia Bremmers ta un instituto di gran balor pa nos komunidat. Dor di sentralisá e guia i tratamentu di muchanan ku un desabilidat òf outismo den un sentro, por hasi uso optimal di e konosementu i ekspertisio ku ta presente riba nos pais. Esaki ta brinda akseso na materialnan adekuá di terapia i tambe uso optimal di espasio pa tratamentu, guia, rekreo i momentunan di sosiegu. De SGR-Groep – Fundashon Verriet, lo sigui hasi tur esfuerso nesesario pa sigui desaroyá e instituto den un sentro di pasadia i terapia spesialisá pa muchanan ku un desabilidat i outismo. Pa realisá esaki nos ta trahando ku un tim multidisiplinario ku ta hasi uso di un sistema metódiko i spesífiko segun e último desaroyonan sientífiko. Tur esaki ta tuma lugá den un esfera kaminda tin atenshon personal pa kada mucha i su nesesidatnan.

Danki di kurason!
Ku satisfakshon i orguyo, De SGR-Groep – Fundashon Verriet, por bisa ku awor tin un edifisio kompletamente renobá ku ta apropiá i agradabel pa nos muchanan. A kosta hopi pa yega na e rekursonan finansiero pa renobashon di e edifisio originalmente di Instituto Mgr. P.I. Verriet, pero e resultado ta bale la pena. E rekonstrukshon ta finansiá pa un parti ku sènnan ku SVB a hasi disponibel for di e fondo di AVBZ, pa un otro parti for di un finansiamentu di Monumentenfonds i tambe for di donashonnan. Banda di esaki De SGR-Groep mes a finansiá un parti importante for di su propio reservanan. De SGR-Groep – Fundashon Verriet ta mashá agradesido na SVB, Monumentenfonds i tur esnan ku a hasi donashon, pa nan kontribushon. Ademas e fundashon gradesí esnan ku direktamente a sòru pa e rekonstrukshon, esta e arkitekto P.P.D, e kontratista mayó CurCon i e diferente otro kontratistanan i konseheronan. Naturalmente e kontribushon di e propio personal tabata esensial, tantu di e personal di kuido komo di e diferente departamentonan di servisio di De SGR-Groep.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: