Aña 2017, meresé ta kompañá ku ambishon haltu!….. Carifta Games ta un oportunidat di oro.

Aña 2017, meresé ta kompañá ku ambishon haltu!….. Carifta Games ta un oportunidat di oro.

Nos ta bai drenta un aña nobo i lógikamente tur hende ke weta padilanti pa antisipá riba loke ta spera nos durante e aña nobo.
Sigur mirando ku ta reina inseguridat di trabou den seno di bastante famia, debí na kuponan di trabou ku ta menasá di bai pèrdí, no ta keda nada otro sino di uni nos mes tras di esfuersonan pa realisá retonan nobo. Kòrsou tin den preparashon Carifta Games pa tuma lugá dianan 15, 16 i 17 di aprel 2017, ku ta kompetensia di renombre pa weganan di atletismo entre deportistanan di Karibe. Carifta Games en realidat ta kompetensianan famá ku ta eksistí for di aña 1972, ku entre tantu a krese i bira sumamente popular i atraktivo. Nan ta yama Carifta Games, e weganan olímpiko di Karibe! Pa loke ta trata Kòrsou den e aña nobo, e gran evento aki ta tuma lugá den Sentro Deportivo Kòrsou! Por lo ménos 26 pais manera Jamaica, Trinidad & Tobago, Bahamas, Martinique, Barbados, Cayman Islands, Grenada, Bermuda, Guadeloupe, Turks and Caicos Islands, Sint Kitts, Sint Lucia, Antigua, Guyana, British Virgin Islands, Dominica, Surnam, Belize, Haiti, Sint Vincent and the Grenadines, Aruba, Curacao ta e partisipantenan ku en realidat ta representá alrededor di 600 atleta. Un grupo grandi di periodista di e diferente paisnan den Karibe lo bini Kòrsou spesialmente pa e Carifta Games, ademas vários skout pa buska potensial atleta i of esnan mas talentoso pa bira miembro di nan klup. Ainda tin transmishonnan na televishon pa tuma lugá atraves di FLOW tur e dianan durante 6 ora ku por alkansá 200.000.000 televidente den Karibe, Canada i Merka. Kòrsou a lobi pa logra e weganan i awor ta momento pa kumpli. Mester realisá kampaña agresivo sufisiente pa atraé spònser komo instansianan dispuesto pa patrosiná e gran evento aki. Te asina leu tin menshoná komo patrosinadó embahada chines, Maduro & Curiel’s Bank (MCB), Mangusa Supermarket, Flow, Curoil, Reda Sosial, Ofisina di Turismo (CTB), pero e kantidat aki no ta sufisiente.
1. E organisashon mester envolvi pueblo di Kòrsou masalmente i lanta den pueblo e interes pa ta partísipe na e evento aki, sòru ademas ku lo duna bon servisio na tur nos bishitantenan for di eksterior i krea un ambiente sumamente atraktivo i inolvidabel. Den e kuadro aki mester organisá marshe di produktonan lokal i benta di souvernir, meskos ku tabata e kaso ku e weganan olímpiko na Rio de Janeiro.
2. For di Bándariba te Bándabou mester hiba akshonnan di limpiesa riguroso di manera ku Kòrsou ta lusi mas atraktivo i haña e kara di un isla ku un naturalesa i medioambiente klase aparte. No wak e tempu kòrtiku ku falta, sino kuminsá awor ku e konsientisashon ku poulatinamente mester intensivá i bira mas profundo.
3. Ku dekorashon kolorido atraves di lus i limpiesa mester hinka nos sentronan komersial Punda, Otrobanda, Saliña i Santa Maria sikiera di 12 te ku 19 di aprel 2017 den un bachi atraktivo i plasentero. Kombiná ku ambiente musikal i kultural.
4. No laga e oportunidat aki bai pèrdí pa promové Kòrsou grandemente den Karibe, invitando pueblonan bisiña pa bin presensiá Carifta Games na Kòrsou. Aki mester hasi uzo konsiente di revistanan turístiko ku ta optenibel den avionnan, na hotèl i na sitionan prominente.
5. Pone billboardnan grandi na sitionan importante.
6. Meskos ku tabata e kaso na Rio di Janeiro relashoná ku weganan olímpiko, kombertí nos aeropuerto Hato den un sitio ku ta duna publisidat masal na e gran aki.
7. Kòmbersá i palabrá ku taksista i shofùrnan di bùs pa nan bira agentenan ku ta yuda promové i plama konosementu di e evento aki den pueblo.
8. Stimulá restorantnan i sitionan di atrakshon pa ta kreativo den nan dunamentu di servisio. Si ta nesesario pone premio pa esnan ku mas ta kumpli!
9. Start ku kampañanan di informashon na radio i televishon, konsentrando riba e partisipantenan den e kompetensia di atletismo aki i Carifta Games en general.
Kòrsou en realidat no ta asina popular den Karibe, pero ku loke nos tin den man na posibilidat atraves di Carifta Games durante e aña nobo, nos mester ta desididu pa deliberadamente uza e oportunidat pa presentá e isla aki mas mihó posibel e spòtlait internashonal.

This site uses Akismet to reduce spam. Learn how your comment data is processed.

error: Content is protected !!
%d bloggers like this: