KOALISHON A KOMETÉ UN VUPÁ I ta purba drecha kos awor.

 

 

Kralendijk, 12 Òktober 2022 – Koalishon mes a hinka nan kurpa den un kamisa di ònsebar. Promé ku a bin ku e moshon di nan i esun di PDB, mi frakshon a trese un moshon ku e meta pa trese e bèrdat na kla pa loke ta trata e akusashon ku gobernashon lo ta violando e prin­si­pio di integridat den nan prosedernan i tambe den nan toma di desishonnan. E moshon aki tabata basá riba e kantidat di señalnan ku tabata yega na orea di Konseho Insular i di komunidat boneriano atraves di diferente rapòrtnan, pero tambe atraves di medionan di komunikashon, enkuentronan personal ku siudadanonan i empresarionan i ku a kulminá den un publikashon devastador di e plataforma periodístiko Follow the Money.

 

Mi ke enfatisá i tur hende por lesa e moshon ku mi ta pone at­hun­to ku lo a trata “integridat gubernamental”. Pues lo a analisá funshonamentu íntegro di henter Kolegio Ehekutivo i no solamente ún miembro di e aktual gobernashon. E moshon a pidi Konseho Insular i mui en partikular e presidio (lidernan di frak­shon­nan) huntu ku grefir pa aserká un büró eksterno inde­pen­dien­te pa hasi e investigashon aki i mi a sugirí pa aserká e büró BING, kende ta eksperto riba e tereno aki i ku ta gosa di un reputashon intachabel.

 

Mi a purba pa haña Konseho Insular unánimemente pa para tras di e moshon aki. Sinembargo frakshonnan di MPB i UPB tabata ke pa menshoná eksplísitamente gezaghèber komo e tópiko di e in­vesti­gashon. Esaki tabata inakseptabel p’ami, ya ku mi ta di opi­nion ku gezaghèber ta parti di un Kolegio i komo tal su aktua­shon ta kargá pa henter Kolegio pues a bira un aktuashon di Kole­gio Ehekutivo kompleto.

 

Akseptashon di mi moshon lo a enserá ku e trabounan por a kuminsá mesora, miéntras ku den un tempu kòrtiku Konseho Insular i komunidat boneriano lo a haña sa e bèrdat. I manera mi a trese den mi disertashon, e bèrdat ta importante pa pueblo haña sa kiko a bai robes, na unda ela bai robes, pakiko ela bai robes, kiko ta e konsekuensianan i kiko lo mester hasi na nos proseduranan interno pa evitá ripitishon. Alabes lo a haña sa ken ta responsabel pa loke a bai robes.

 

E moshon di PDB a haña mi sosten ya ku e kier logra e mesun meta, esta haña sa ku si en bèrdat e gobernashon ta violá prinsipionan di integridat. E diferensia ta ku e moshon di PDB ta e instrumento mas pisá ku Konseho Insular por apliká, pero e ta rekerí un preparashon mas kouteloso i ku mester di un ordenan­sa di lei pa aplik’é. Ku esaki e lo por dura mas largu ku nos a deseá.

 

Pa loke ta e moshon di koalishon, mi a vota kontra pa algun mo­ti­bu. Nan ta ku ni koalishon komo mayoria pero tampoko Konseho Insular den su totalidat no tin e outoridat pa pone gezag­hèber riba non-actief i kuné no por instruí e gezaghèber in­te­rino traha ningun komishon, miéntras ku gezaghèber mes t’ei. E di dos motibu ta ku e moshon no ta reflehá e tópiko di e agènda ku nos a trata, esta Integridat gubernamen­tal. Ela kue e direkshon ku ta solamente gezaghèber mester keda investigá, siendo ku gezaghèber no por aktua riba su so, ya ku e ta forma parti di un Kolegio i komo tal ta henter e kolegio ta responsabel. I komo ta un moshon ku na mi pareser no ta ehekuta­bel, ela pèrdè tur forsa. Pió ainda, koalishon a hinka nan mes den un kami­sa di ònsebar i mester a kore traha un komunikado pa trata na splika kiko nan tabata kier men ku e moshon. I ta un konklu­shon por saka, esta nan no kier a karga ningun responsabilidat di nan funshon di kòntròl, pero a hinka e asuntu bèk den man di ge­zag­­hèber i a spar nan diputadonan.

 

Mirando e diskushonnan rondó di e tema aki, mi a konsiderá pa trese mi punto di bista dilanti pa loke ta e moshon ku mi a pre­sen­tá den Konseho Insular mardugá di djamars pa djárason.

 

 

Désirée Coffie

Miembro di Konseho Insular

 


 

Share this page to Telegram

This site uses Akismet to reduce spam. Learn how your comment data is processed.

%d bloggers like this: