Premio Tumba Kultura

Premio Tumba Kultura

Tumba Kultura ta e piesa di kua totalidat integral di su elementonan ta duna e aporte mas grandi na Kultura di Kòrsou. E elementonan ta: a. Letra b. Melodia c. Areglo d. Uso di Instrumento vokal e. Uso di Instrumento musikal i f. Uso di esenario.

Lo saka e premio aki for di e tumbanan ku klasifiká.

Premio Tumba Kultura ta pa stimulá e artista kreadó di piesa ku ta partisipá na Festival di Tumba di Karnaval di Kòrsou, pa: a) Ta konsiente di su funshon komo edukadó; b) Hasi esfuerso pa fortifiká nos nashon; c) Halsa norma i balor; d) Stimulá i kultivá sentido di patriotismo; e) Kontribuí na desaroyo di idioma Papiamentu; f) Duna balor na elementunan di herensia kultural; g) Eksponé dignidat di Yu di Kòrsou.

Definishon di Kultura: Kultura ta e manera ku hende ta anda ku otro. E manera ku hende ta trata otro, biba ku otro, forma famia, forma grupo, traha huntu, organisá aktividat, rekreá. Kultura ta tambe e manera ku hende ta anda ku su medio ambiente ku flora, founa. E manera di anda di hende ta tuma lugá den un kuadro spesífiko di teknologia, simbolismo, idioma, balor i norma (regla e.o. lei). Pa medio i den e kuadro kultural akí hende ta husga, pensa, opiná i tuma desishon. E manera di anda akí (kultura) ta suheto na kambio konstante. KULTURA TA BIBU.

Premio Tumba Kultura ta konsistí di: 1. Akuerdo entre Kas di Kultura i Kreadó di e piesa, pa kombertí e Tumba den un pakete di formashon i edukashon pa Kòrsou su komunidat en general, ku enfasis riba skol i organisashonnan sosial. Lo tradusí e pakete na spañó, ingles i hulandes; E pakete lo konsistí di video, letra original, buki ku teksto i enkargonan; 2. Trofeo; 3. Montante efektivo.