Boneiru den pleno sentro di atenshon na Oropa

Boneiru den pleno sentro di atenshon na Oropa

Kralendijk (9 di febrüari 2017) – E simannan ku a transkurí a traha duru riba promoshon di Boneiru den e merkadonan oropeo mas importante, manera Alemania (BOOT), Bèlgika (Vakantiesalon Antwerpen) i Hulanda (Duikvaker).

Siman pasá Boneiru a risibí hopi atenshon di bishitantenan di BOOT Düsseldorf, e bolsa di deporte akuátiko mas grandi di Oropa. Na mes momentu tabatin un tim di Boneiru ku a papia ku bishitantenan flamenko di ‘Vakantiesalon’. Durante e bolsa di fakansi di Vlaanderen hopi bishitante tabatin oportunidat pa hasi pregunta tokante Boneiru. Wikènt pasá tabatin un delegashon grandi di no ménos ku 10 empresario di Boneiru presente na ‘DuikVaker’, e bolsa di buseo mas grandi di Hulanda.

“Ta importante pa Boneiru ta aktivamente presente huntu ku empresarionan turístiko den nos merkadonan mas importante. BOOT i Duikvaker ta eventonan importante pa nos turismo di buseo. Banda di sambuyadónan nos ta mira tambe mas i mas bishitante di Vlaanderen, ku kier relahá aktivamente riba nos kariñoso isla karibense. P’esei nos tabata pa di promé bes presente na Antwerpen. Asina nos por sigui amplia e bon reputashon di Boneiru na Vlaanderen, Alemania i Hulanda komo un tòp destinashon internashonal pa turista”, segun señor Maurice Adriaens, direktor di Tourism Corporation Bonaire.

Boneiru ta internashonalmente konosí komo destinashon di buseo i tambe mas i mas turista ta deskubrí e isla pa bai snòrkel, windsurf, kitesurf, kore baiskel i kana keiru.
Pa mas informashon por tuma kontakto ku Roger Davids via europe@tourismbonaire.com