Minister Yrausquin a scucha di studiantenan con por mehora servicio di Gabinete di Aruba

Exitoso encuentro na Groningen

“Minister Yrausquin a scucha di studiantenan con por mehora servicio di Gabinete di Aruba”

Den Haag – Un anochi sumamente informativo y constructivo. Asina Minister Plenipotenciario Juan David Yrausquin a caulifica su encuentro cu alrededor di 50 studiante na Plaza Danza na Groningen. E grupo tabata un mixto di studiantenan for di Groningen y for Leeuwarden.

Na comienso di e encuentro minister Yrausquin a bisa di ta contento cu hopi studiante a responde positivo riba su invitacion pa e anochi aki. E mandatario a bisa di a bin na e encuentro aki cu un solo meta y esaki ta pa scucha kico ta biba bou di e studiantenan Arubiano en general, pero e bi-aha aki particularmente bou di esnan cu ta studia na Groningen y Leeuwarden. ‘No tene miedo pa expresa boso comentarionan tocante boso experencia cu Gabinete di Aruba y boso mentor. Nos tey pa scucha y sigur nos tey pa yuda unda mester. Gabinete di Aruba como organisacion ta costa 5 miyon florin pa aña y parti di e inversion aki mester refleha riba boso provenir y exito aki na Hulanda. Aña pasa un total di casi 100 studiante a caba nan estudio cu exito. Esaki por mihor, pesey mi ta interesa den tende kico por ta e obstaculonan cu boso ta encontra durante di boso estudio. Pero principalmente mi ta interesa pa tende unda Gabinete di Aruba por brinda aun mas sosten pa hisa e porcentahe aki considerabel, asina minister Yrausquin a bisa.

E tema di e anochi aki tabata come saludabel. Hannie Poletiek di GGD di Groningen a tene un charla riba nutricion y e maneranan pa cushina saludabel. Mientrastanto e studiantenan por a dis-fruta di un cuminda saludabel, prepara pa e conocido chef Caribense Hubert Trinidad.

Minister Yrausquin a tuma tempo pa a pasa na cada mesa y a sinta papia y scucha loke e studian-tenan tin di bisa riba nan bida como studiante. Na final e studiantenan a expresa nan satisfaccion riba e initiativa di e minister pa cu e anochi aki y tambe nan a gradici e mandatario pa e invi-tacion.

Nota pa redacion: Potretnan ta di Gabinete di Aruba

This site uses Akismet to reduce spam. Learn how your comment data is processed.

%d bloggers like this: