“MASTERPLAN PPA PA ORANJESTAD; Un WARDA DI POLIS NA EX JOHN F KENNEDYSCHOOL!”
EDDY BENNETT PPA
“MASTERPLAN PPA PA ORANJESTAD; Un WARDA DI POLIS NA EX JOHN F KENNEDYSCHOOL!”
Partido PPA ta den proceso pa prepara e proximo programa di gobernacion cu lo presenta na pueblo pa eleccion 2017.
Den e cuadra aki e ‘Think Thank’ di PPA a reuni y a pa prepara diferente projecto basa riba vision y maneho real. PPA tin un vision pa henter Aruba y cual nos ta jama ‘Aruba HUB den Caribe !
E vision aki ta basa riba un planificacion real y factibel cu PPA a bin cune algun decada atras caba y cu awe ainda ta valido y ehecutabel pasobra e vision a largo plaso di PPA a demostra di a funcciona y cu adaptacionnan inovativo di e Think Tank awor ta cla pa bay wordo implementa!
PPA den su trayectoria historico a demostra di tin vision a largo plaso cu a resulta beneficioso pa pais Aruba manera entre otro; Proyecto Turismo na Palm Beach, aeropuerto di Aruba, Aviacion en general, Pensioen, school pa pueblo den cada distrito, infrastructura manera entre otro WEB, mudamento di Container Haven pa Barcadera y careteranan y hopi mas.
Fuera di e vision major aki, PPA tin vision pa desaroyo di varios distrito riba nos Isla. Y den e cuadro aki PPA a reactiva y inova su ‘Masterplan pa desaroyo di Oranjestad y vecindario !”
Den inovacion di e Masterplan a bin riba mesa no solamente e desaroyo economico pero tambe e desaroyo social, educacional etc y automaticamente e seguridad y con nos Cuerpo di Polis ta funciona for di e actual edificio cu diferente signatura a permiti nan funciona aden ultimo añanan.
PPA a tuma nota cu e situacion den e edificio aki esta e Warda di Polis na Playa, cu nunca tabata na un nivel halto, a bai ainda mas atras den curso di tempo. Afectando e funcionamento di nos Cuerpo di Polis den curso di tempo pero tambe e parti di nos ‘Politiecellen’ ta worde cuestiona si nan ta pasa e ‘toets’ di locual ta necesario pa cumpli cu derecho humano.
Tambe PPA ta cuestiona cu ora Polis kier sali pa un of otro emergencia, esta ‘ruk uit’, si e salida di e lugar aki ta esun di mas efficiente? Den e cuadro aki PPA su ‘Think Thank’ a repasa e informenan cu nos a ricibi den curso di tempo pero tambe e pensamento y proposicion cu a bin riba mesa durante di nos reunionnan.
E pensamento aki no ta nobo pero si e ‘prioridad cu nos lo duna na dje’. Y den e cuadro aki nos ‘Think Thank’ a jega na e proposicion, cual a worde aproba pa nos Directiva / Conseho di Partido pa agrega e siguiente vision/projecto como un parti integral di nos ‘Masterplan pa desaroyo di Oranjestad y vecindario’.
Den e cuadro aki PPA ta propone lo siguiente na pueblo di Aruba y ta pidi e actual gobierno di Aruba pa
tene debidamente cuenta cu e vision y proyecto pa eleva seguridad di nos Isla y nos capital:
Construi e siguiente ‘Warda di Polis pa Oranjestad/Dakota y vecindario na e x Edificio di John F. Kennedyschool !!!
Argumento di PPA pa e vision/projecto aki ta lo siguiente:
1. Construyendo un Edificio bon planifica basa riba normanan y exigencianan moderno pa funcionamento profesional di un ‘Warda di Polis’ na Oranjestad. E edificio su parti di ‘Politiecellen’ lo cumpli cu ‘derechonan humano conforme nivel y exigencianan Europeo. 2. E lugar ‘specifico’ aki lo cumpli cu tur exigencia di un ‘Warda di Polis profesional’ for di unda por ‘ruk uit’, esta sali eficientemente den cualkier direccion cu mester. Via L.G. Smith Blvd, Vondellaan, Lacle Boulevard den direccion pa Oranjestad, p/m di Vondellaan y Stadionweg pa Dakota y p/m di e caminda principal direccion pa p/e Aeropuerto y otro distrito ora asistencia ta necesario. 3. E Proyecto inovativo aki lo contribui na e seguridad di e personal cu ta traha den e Edificionan di gobierno, esta Finanzas, Ontvanger y Belastingen, banco y otro negoshinan cu ta net pariba di dje. 4. For di e Warda di Polis nobo aki Aeropuerto lo ta hopi mas acesibel na momento cu asistencia mester worde duna den caso di cualkier emergencia. 5. Presencia di Cuerpo di Polis lo contribui na mas seguridad den e area conoci como Talk of the Town, unda awendia tin varios negoshi. 6. Pa Parada di Carnaval e lugar aki ta duna Polis un mihor control y infrastructura operacional pa asina por mantene Orden Publico y garantisa seguridad di pueblo hopi mas mihor. 7. Pa actividadnan na Cas di Cultura, Stadion Guillermo Trinidad, Marlboro Ballpark y Entertainment Center, presencia di e Warda di Polis nobo aki, ta duna un mihor seguridad en general! Basa riba e factibilidad di tur argumento menciona, PPA ta lansa e proyecto pa nos futuro Warda di Polis pa Oranjestad/Dakota y vecindario worde construi na x John F Kennedyschool.
Nos a comprende cu e actual gobierno a jega di menciona construccion di un John F. Kennedy Auditorium pero cu e crisis financiero di gobierno no a permiti gobierno jega sina leeuw.
PPA ta propone pa jama e proximo warda di polis pa Oranjestad/Dakota ‘Warda di Polis ‘Presidente John F Kennedy’ !!
E vision/projecto aki ta forma parti di e ‘Masterplan Integral di Partido PPA pa eleccion 2017’. PPA ta spera cu gab. Mike Eman cu visiblemente no a inicia nada na e lugar aki tene debidamente cuenta cu e vision/idea aki di partido PPA y tene e lugar bashi pa asina e proximo gobierno por use conforme e vision/idea aki.
PPA lo continua cu nos trabao interno den preparacion di e vision y plan di partido PPA pa futuro den nos ‘ThinkThank Patriotico’ y lo participa pueblo regularmente nos vision y plan pa hiba nos
pais pa un futuro eleva.
Aruba, 15 di januari 2017 Eddy Bennett
Presidente di PPA