Alumnonan di Maria Immaculata Lyceum ta presentá nan kreashon di un prototipo inovativo na Minister Presidènt Hensley Koeiman

Alumnonan di Maria Immaculata Lyceum ta presentá nan kreashon di un prototipo inovativo na Minister Presidènt Hensley Koeiman

WILLEMSTAD – Tres hóben sumamente talentoso, ku ta terminando nan preparashon eskolar na nivel VWO-6 na Maria Immaculata Liceum (MIL), kompañá pa nan dosente, djaweps atardi tabata di bishita serka Promé Minister demishonario sr. Hensley Koeiman pa un presentashon di nan ‘profielwerkstuk’ di e materia Informatica.
E hóbennan a duna un splikashon profundo den forma di un presentashon den kua nan a splika kon nan a yega na e idea pa krea un prototipo di un sistema duradero ku nan a yama “GEAUTOMATISEERDE LAMELLEN” ku ta generá su koriente a base di selulanan solar. Alaves e prototipo aki ta usa sènsòrnan ku ta pone ku ora ta di dia e lamèlnan ta habri pa klaridat i bientu i anochi ta sera pa skuridat. Tur esaki a keda programá pa e studiantenan mes basá riba e konosementu ku nan a generá den nan estudio ku nan a risibí den transkurso di añanan serka nan dosente di Informatica sr. Losiabaar.
E sistema di prototipo ku nan a desaroyá ta resultado di un proyekto ku nan a skohe pa sera èksamen kuné. Esaki ta enserá mas ku 80 ora di investigashon, pero tambe mester skibi un relato i esaki mester ser akreditá.
Komo konsekuensia di e bon resultado di nan proyekto, a inskribí e tres hóbennan, Eduard de Palm, Aaron Merite i Joshua-Grabriël Zimmerman na e konkurso ku ta tuma lugá tur aña na Hulanda ku yama 3i Award, kual ta un kompetensia den e mundu di Informatica(ICT) di tur skol HAVO/VWO rònt Hulanda, Studiantenan na Kòrsou tambe ta permití pa kompetí na esaki.
Komo skol avansá na Kòrsou, MIL ta sumamentu kontentu i orguyoso di mira kon nos hóbennan ta profilá i ta krea produkto/sistemanan riba nivel haltu. Un danki speshal ta bai na sr. Losiabaar ku ta eminente den e mundu di ICT i semper ta kla pa guia i ta inspirá su studiantenan pa krea produkto òf sistemanan inovativo.
Riba potrèt por mira Minister Presidente sr. Hensley Koeiman, e dos studiantenan Eduard de Palm, Joshua-Grabriël Zimmerman i nan dosente sr. Sandy Losiabaar. Alumno Aaron Merit debi na un otro kompromiso no por tabata presente.

_dsc3142

_dsc3156

_dsc3157

_dsc3167

This site uses Akismet to reduce spam. Learn how your comment data is processed.

%d bloggers like this: