VIDEO KOMPLETU DI E RUEDA DI PRENSA: KOMUNIKADO DI KUERPO POLISIAL KÒRSOU Tareanan di KPC i OM durante marchanan di Karnaval 2017

KOMUNIKADO DI KUERPO POLISIAL KÒRSOU
047 / 2016
16 di febrüari 2016

Tareanan di KPC i OM durante marchanan di Karnaval 2017

KARNAVAL 2017 16-2-2017 Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ

Polis Meskos ku tur dia durante temporada di Karnaval tambe Polis lo sòru pa mantenshon di órden públiko i mantenshon di lei; riba dianan di marchanan di Karnaval e enfoke lo ta riba 5 área di atenshon, esta: 1. ora e públiko sali kas 2. na momentu ku e públiko ta riba kaminda pa e aktividat; 3. estadia di e públiko den área di e aktividat; 4. ora e públiko sali for di e área di aktividat; 5. ora e públiko yega kas bèk. Pa por organisá e trabounan polisial a instituí un asina yamá “Staf Grootschalig Bijzonder Optreden (SGBO)”. Lo hasi kòntròlnan preventivo i Polis lo aktua firme kontra infrakshonnan di lei i akshonnan ku ta stroba órden públiko.

Bendementu di kos kantu òf riba kaminda públiko Personanan ku ta deseá na bende konsumo òf artíkulonan durante di e marchanan di karnaval, tin posibilidat pa hasi un petishon pa pèrmit pa esaki na Vergunningenloket; mirando ku awor esaki no ta kai bou di KPC mas, pero bou di Ministerio di Desaroyo Ekonómiko (MEO). Tin e posibilidat tambe pa bende kos for di un edifisio òf lokalidat pero pa hasi esaki: 1. Mester kumpli ku kùrmentu di e lokalidat segun eksigensianan di a Salubridat Públiko UO G&GZ (ántes GGD) pa tantu e kushina komo baño, mester tin entre otro konekshon di pipa di awa di Aqualectra; 2. Mester kumpli ku kùrmentu di e lokalidat segun eksigensianan di Brantwer; 3. Por bende kuminda i bebida pa bai kuné so. Lo tin kòntròl di esaki tantu dor di Polis komo di Salubridat Públiko UO G&GZ, MEO i Brantwer.

Konhunto ku Ministerio Públiko Kuerpo Polisial huntu ku Ministerio Públiko, den afan pa sòru pa òrdu públiko i seguridat keda garantisá durante di marchanan di Karnaval, sigur lo apliká es aña aki un bes mas e akshon “Aktua robes, sintié un bes”. Durante di e marchanan benidero lo bai aktua severo kontra bròmer, motosaikel, ‘quad’ èts. ku ta violá regla i leinan di tráfiko. E delitunan aki ta e.o.: ponementu di ‘fever’, rankamentu, hòpmentu; kore sin hèlmu (esaki no ta konta pa shofùr di ‘quad’); kore bròmer òf motosaikel sin karchi di kùr, reibeweis òf papel di seguro bálido; sin plachi di number òf ku esaki no ta sufisiente visibel; ekseso di zonido innesesariamente. Ta supliká un i tur pa tuma bon nota di esaki.