CAROLINE DOMACASSÉ A SELEBRÁ 30 AÑA DI SERVISIO DI GOBIERNU.

CAROLINE DOMACASSÉ A SELEBRÁ 30 AÑA DI SERVISIO DI GOBIERNU.

Kralendijk—Djabièrnè, 17 di febrüari 2017 señora Caroline Egidia Domacassé, mihó konosí komo Lientje Domacassé a kumpli 30 aña prestando servisio na gobièrnu di Boneiru.

Na e okashon aki tabata presente señor Joselito Statia den representashon di diputado Nina Gougon- den Heyer ku ta den eksterior pa motibu di trabou.
Na e okashon aki diputado Statia a duna hopi mérito i elogio na sra. Domacassé pa e bon trabou prestá na gobièrnu i a ekspresá su gratitut na e hubilario i a para ketu na karera di trabou di e hubilario, aportando na komunidat i gobièrnu di Boneiru.

Señora Domacassé a kuminsá su karera 30 aña pasá na na gobièrnu riba 18 di febrüari 1987 i a traha kasi dos aña na servisio di Loonbelasting. Despues e la haña traspaso pa Departamentu di Kultura i Edukashon, kaminda e la traha pa un periodo di mas òf ménos kuater aña. Despues di esaki sra Domacassé a traha un periodo komo sekretaria di diputado Jose Winklaar. E hubilario a traha tambe na Departamentu di Archivo, pa despues bai bèk Departamentu di Kultura i Edukashon. Finalmente na aprel 2012 Lientje a bai presta servisio pa Direktorado Komunidat i Kuido komo sekretaria/kolaboradó atministrativo den sekshon di atministrashon, na unda e ta trahando tambe aktualmente.

Na e okashon spesial aki, señor diputado Joselito Statia, na nòmber di diputado Nina Gougon-den Heyer i gobièrnu di Boneiru a felisitá sra. Domacassé pa e 30 aña di servisio prestá na komunidat di Boneiru.
Koleganan tambe tabatin hopi bon palabrá pa sra. Domacassé i a hasi entrega di un bukèt di flor komo muestra di apresio. E selebrashon a tuma luga na patio di SKAL na Playa Pabou.

Despues di e palabranan bunita di elogio na sra. Caroline Domacasse diputado Statia a hasi entrega di e sertifikado di mérito i e ènvelòp ku kontenido di 30 aña di servisio na sra. Domacassé.
Den su spich sra Domacassé a gradisí señor Dios, su famia i koleganan pa e sosten risibí durante añanan ku a transkurí. Finalmente e hubilario sra. Domacassé, koleganan, èks koleganan i su invitadonan den un ambiente ameno huntu na e patio di SKAL (Servisio Kultura Arte i Literatura) ku diputado sr. Joselito Statia a brinda na e okashon aki.