PUNTO DI BISTA DI GOBIERNU DI KORSOU RELASHONA KU E MOSHONNAN DI PARLAMENTO DI DIA 3 DI MART 2017

gobiernu-di-korsou-logo-big.jpg

PUNTO DI BISTA DI GOBIERNU DI KORSOU RELASHONA KU E MOSHONNAN DI PARLAMENTO DI DIA 3 DI MART 2017

Willemstad – Djabièrnè último Parlamento di Kòrsou a tene un reunion den kua a pasa tres moshon. Un di moshonnan di e mayoria nobo ta, ku nan ta eksigí di Gobièrnu demisionario pa hala aden e Landsbesluit di 12 di febrüari 2017 pa disolvé Parlamento i para elekshon. Ademas nan ta hasi un apelashon riba Gobernador, pa si Gobièrnu pa mas tarda 6 di mart próksimo no ehekutá e moshon, aserka Gobièrnu di Reino pa destruí e Landsbesluit ku ta disolvé Staten pa mas tarda 7 di mart. Si esaki no sosodé e moshon ta konkluí pa sigui ku e reunion di Staten riba 7 di mart pa trata relato di Presidente di Parlamento riba e asuntu aki.
Pues e parlamentarionan ariba menshoná ke stroba nos Pueblo pa den un elekshon liber i sekreto duna su opinion riba loke a bin ta sosodé despues di elekshon di 5 di òktober último. Ke empedí pueblo pa skohe entre e grupo di 12 nobo òf e grupo di 9 ku tin mas tantu voto popular, ku e grupo di 12.

Mester realisá ku e 2 parlamentarionan di PS i e dos parlamentarionan ku a bai ku asiento di nan partido huntu no ta yega ni un tersera parti di e kantidat di voto rekerí pa saka un asiento den Parlamento.
Loke ta mas tristu ta, ku e parlamentarionan konserní ta mina nos outonomia dor di bai puntra Reino ( lesa Hulanda) pa drenta den gobernashon di Kòrsou. Remarkabel ta ku diferente di e partidonan aki ku semper a bisa di no ke tin nada di hasi ku Hulanda, awor ke bai pidi Reino (lesa Hulanda) ayudo pa atendé ku nos asuntunan interno! Ku otro palabra, nan ta manda un señal ku nos mes no por resolvé nos problemanan, pero ku ta e eks kolonisadó mester bin hasi esaki pa nos. Esaki ta un bèrgwensa nashonal.

Ta bon pa informá, ku logikamente Gobernador lo no a firma e Landsbesluit si e no tabata kuadra ku tratadonan internashonal, Statüt, Areglo di Estado i Kiesreglement.

This site uses Akismet to reduce spam. Learn how your comment data is processed.

%d bloggers like this: