Minister Koeiman ta tene rueda di konsulta ku diferente organisashon den enseñansa Problemátika di finansa den enseñansa ta agudo

Minister Koeiman ta tene rueda di konsulta ku diferente organisashon den enseñansa Problemátika di finansa den enseñansa ta agudo

WILLEMSTAD – Den transkurso di e siman aki Minister Koeiman i Ministerio di Enseñansa, Siensia, Kultura i Deporte a tene reunionnan di ku representantenan di diferente organisashon di sektor di enseñansa. A skucha di kada organisashon kiko ta e retonan di mas agudo ku nan mester enfrentá riba término korto, kon ta mira ku Gobièrnu mester ta di sosten pa por atendé ku e retonan, i kiko ta e senarionan di sosten di gobièrnu no ser realisá. Tambe a diskutí riba e situashon di falta di kumplimentu di gobièrnu ku kompromisonan i espektativanan ku a kreá den pasado pa solushoná diferente problemátika ku nan a informá Gobièrnunan anterior di dje. Prinsipalmente e situashon di redukshon kontinuo di último añanan den presupuestonan i supsidio di e organisashonnan ta pone nan situashon hopi difísil pa kumpli ku nan kompromisonan.

Den e reunion aki e organisashonnan Universidat di Kòrsou (UoC), Stichting Studie Financiering (SSC), Fundashon Material pa Skol (FMS), sindikato SITEK, i tur e 8 direktivanan di skol a duna un splikashon konkreto di e situashon agudo ku nan ta aden, i kiko gobièrnu mester kumpli kuné, pa nan por kumpli ku kompromisonan.

Pa loke ta trata UoC:
Mester di 17.5 mion en bes di 15 mion. Konsekuensia di esaki ta ku UoC no por kumpli ku diferente gastu pendiente, miéntras ku tin ménos entrada komo resultado di un bahada di e kantidat di studiante.

Pa loke ta trata SSC:
Mester di 4 mion pa por kontinuá brinda studiantenan posibilidat di sigui studio avansá den region. SSC a disidí ku pa mas tardá 31 di mart próksimo mester tin klaridat tokante e sèn disponibel pa SSC pa por kontinuá e aña aki ku e trayekto di studiamentu den region. Tambe mester partisipá e situashon na tempu na e studiantenan ku ke bai studia den region, pa nan por buska otro sitio pa sigui estudionan avansá.

Pa loke ta trata FMS:
Falta di fondo nesesario pa FMS por ehekutá e proyekto di enseñansa liber ta pone ku FMS a hañ’é ta stòp for di 25 di febrüari ku tur trabou pa prepará enseñansa liber.

Pa loke ta trata SITEK:
A bira imposibel pa ehekutá e CAO pa enseñansa ku gobièrnu a firma ku SITEK den ougùstùs di aña pasá pa yuda skol yuda su alumno. Tambe a bira imposibel pa drecha posishon hurídiko di e trahadónan den enseñansa i por konsekuensia ta bira imposibel pa kuminsá solushoná e skarsedat grandi di trahadó den enseñansa pa e aña eskolar ku ta bini.

Pa loke ta trata Direktivanan di skol:
No a aktualisá e normanan pa finansiamentu di nos skolnan. Komo konsekuensia direktivanan di skol ta haña nan ta usa sèn pa paga e.o. gastunan pa paga koriente, awa, afvalstoffen belasting ets., na lugá di aktividatnan nesesario pa e alumno.

Konsiderando e seriedat di e problemátikanan presentá, minister di Enseñansa, Siensia, Kultura i Deporte, Hensley Koeiman, a enkargá e ministerio di enseñansa i ministerio di finansa pa den dos siman, teniendo kuenta ku e situashon finansiero di gobièrnu di Kòrsou, konhuntamente hasi e ehersisionan nesesario pa bin ku proposishonnan ku ta duna perspektiva pa solushonnan pa logra un alivio finansiero pa e situashon krítiko i agudo ku nos organisashonnan den enseñansa ta aden aktualmente.


This site uses Akismet to reduce spam. Learn how your comment data is processed.

%d bloggers like this: