Minister Koeiman ta reuní ku SIGE pa redusí drop i push outs den enseñansa i muchanan na nivel AGO
Minister Koeiman ta reuní ku SIGE pa redusí drop i push outs den enseñansa i muchanan na nivel AGO
WILLEMSTAD – Un di e puntonan di lansa di Minister Koeiman riba tereno di enseñansa ta pa redusí na un mínimo di drop-outs i push-outs den nos enseñansa. E meta di e vishon aki ta pa tur mucha den nos komunidat por yega na minimal un estudio realisá ku éksito na nivel SBO-1.
Den kuadro di e ambishon aki Minister Koeiman a anunsiá den parlamento ku e lo bini ku un plan di akshon pa entrante e aña eskolar entrante intensivá kontròl riba e lei pa enseñansa obligatorio. Den bista di minister Koeiman mester pone un enfoke riba enseñansa na nivel VSBO. Pa duna kontenido na e puntonan menshoná e fundashon Sentro Pa Inovashon i Guia Edukashonal (SIGE) a mobilisá un grupo di funshonario di diferente nivel di enseñansa pa start un proseso di reflekshon riba e problemátika ku studiantenan na nivel di Arbeids Gerichte Onderwijs (AGO) kada aña ta bira mas grandi.
Despues di un proseso amplio di algun siman e grupo a konkluí ku un pakete integral pa por evitá ku AGO ta sigui krese pa motibu ku no tin sufisiente sosten pa e alumnonan ku tin mester di dje.
For di e seshonnan di reflekshon a Sali un pakete di 5 trayekto pa pèrkurá:
1. Yega na formalisashon di e dekreto ku ta regla ki ora un alumno por wòrdu atmití na skol pa AGO
2. Entamá un proseso pa introdusí un sistema di pruebanan den enseñansa di fundeshi ku ta hasi posibel ku e maestro hopi tempran tin bista kua mucha tin mester di yudansa èkstra
3. Krea posibilidat pa muchanan de enseñansa spesial tambe por haña enseñansa avansá i no nesesario mester bai un skol AGO
4. Pèrkurá ku kada skol di VSBO ta ekipá pa duna kada mucha kus in un ayudo èkstra lo drop-out, haña e yudansa nesesario
5. Drecha enseñansa AGO pa e funshoná berdaderamente manera e tabata intenshoná pa funshoná
Minister Koeiman a apresiá e resultado di e proseso di reflekshon i a disidí na adoptá e pakete di medida pa redusí e kandidat di drop-out komo un proposishon ku mester drenta e mulina di ehekushon.
Minister Koeiman a enkargá Ministerio di ESKD pa huntu ku SIGE drenta den diálogo ku direktivanan di skol, representante di trahadó den enseñansa i mayor, pa a base di nan feedback yega na realisashon di e 5 trayektonan ariba deskribí.
