Minister Zita Jesus Leito a tuma desishon riba kontinuashon di Hospital Nobo

Minister Zita Jesus Leito a tuma desishon riba kontinuashon di Hospital Nobo

Willemstad – Despues di a tuma e enkargo di minister di Salubridat, Medio Ambiente i Naturalesa dia 23 di desèmber, Minister Zita Jesus Leito, a pone prioridat riba e proyekto grandi di Hospital Nobo. Un proyekto ku na momentu ku e operashonalisá lo nifiká un adelanto grandi den kuido di salú aki na Kòrsou. Ku un invershon di 421 mion florin konstrukshon di e hospital aki, ta e proyekto di konstrukshon mas grandi ku Kòrsou a konosé. Minister Jesus Leito a indiká ku el a pone komo meta pa sòru pa bèrdat e hospital bini kla denter di e periodo stipulá ku ta mei 2018. Den e 3 lunanan ku a pasa aki el a traha ku hopi determinashon pa por a logra tuma desishonnan konkreto pa por logra e meta aki. Gobièrnu for di 2011 a sera un kontrato ku SONA pa manehá konstrukshon di un hospital riba tereno di Amstel ku despues a kambia na 2013 pa e tereno di Colon na Otrabanda. Sona Gobièrnu a sera tambe un kontrato ku Ballast Nedam pa konstruí e hospital.

Na yüni 2016 Gobièrnu di Kòrsou a pidi un evaluashon di e proyekto dor di ekspertonan pa asina haña un bista di ekspertonan riba tereno di konstrukshon di hospital, maneho di hospital, estado finansiero i legal di e konstrukshon. E rapòrt a keda entregá na gobièrnu den desèmber di 2016 i Minister Jesus Leito a tuma nota di e konklushon i rekomendashonnan di e rapòrt. Banda di e rapòrt ku Minister Jesus Leito a risibí, Minister Jesus Leito a topa ku un konflikto entre di SONA i Berenschot, esun ku el a kontratá pa ehekutá e proyekto p’e. Esaki ta e tópiko ku a dominá den e lunanan siguiente.

Despues di a sinta dia 23 dezèmber 2016, un di e promé aktonan di Minister Zita Jesus Leito tabata pa trata na trese pas entre di e partidonan Sona I Berenschot, dor di nombra un komishon di bon servisio. Tambe pa mustra bon kla ku e konstrukshon di e hospital di ningun manera no por para . Mirando e intensidat di e konflikto ku a kuminsá for di komienso di aña no por a yega na un entendimentu. Gobièrnu tin un kontrato direkto ku SONA, minister a indiká na SONA ku e ta keda tene SONA responsabel pa kualke daño i tambe tardansa ku tin na e proyekto. SONA a garantisá ku e ta sòru pa e proyekto sigui konforme kontrato ku gobièrnu.
Miéntras tantu Minister, huntu ku su ministerio a hasi un análisis di rapòrt di evaluashon ku a keda entrega na desèmber i tambe e konklushonnan i rekomendashonnan.

E konklushon di mas importante di e rapòrt aki ta ku gobièrnu mester tin mas dominio, gara i kontròl riba e proyekto aki i ku e maneho di SONA riba e proyekto aki tampoko no tabata manera mester ta. Konsekuentemente lo mester saka Sona afó.
• Mirando e grandura di e proyekto aki, e konsekuensia devastador ku pasonan deskabeyá por tin riba e proyekto aki minister a tuma e desishon pa eksigí di SONA akshonnan spesífiko ku ta demostrá ku e tin rienda di e proyekto manera mester i demostrá esei miéntras ku gobièrnu ta lanta e órganonan ku lo bai manehá e hospital nobo i e órgano ku ta bai atendé ku e edifisionan.
• Di parti di gobièrnu e ministernan ku tin di aber ku e proyekto ku ta minister di Salubridat, Medio Ambiente i Naturalesa, Finansa i VVRP lo mester traha huntu interministerial pa guia e último parti aki di e proyekto.
• Mester tin komunikashon transparente di e proyekto aki pa pueblo di Kòrsou.
• E área di Otrabanda mester bira un área di salubridat i aktividatnan ekonómiko. Mester bini un plan konkreto pa esei
• Pa loke ta trata e kuido , lo bin un laboratorio di hospital i lo mester traha un Sentro di parto den e área di Hospital Nobo.
Pa loke ta transishon pa e hospital nobo mester traha riba e preparashon di trahadónan i un organisashon nobo pa e hospital nobo. Asina Minister Zita Jesus-Leito a trata pa denter di e periodo kòrtiku aki , trese klaridat den e área aki i ta deseá e minister entrante éksito pa por sigui pa asina garantisá ku e hospital lo keda kla pa mei 2018.

Minister Zita Jesus Leito

This site uses Akismet to reduce spam. Learn how your comment data is processed.

error: Content is protected !!
%d bloggers like this: