Un biaha mas studiantenan a expresa nan satisfaccion pa por a dialoga cu Minister Yrausquin
Un biaha mas studiantenan a expresa nan satisfaccion pa por a dialoga cu Minister Yrausquin
Den Haag – E grupo grandi di studiante for di Arnhem, Nijmegen y Wageningen a expresa nan aprecio pa por topa y papia cu Minister Plenipotenciario Juan David Yrausquin. Esaki a tuma lugar na Hogeschool van Arnhem y Nijmegen (HAN). E anochi aki tabata tin un aspecto special na momento cu Cresci-Anne Croes, studiante Voeding y Dietetiek, a duna un splicacion riba e cuminda y con pa come saludabel. Cresci Anne Croes a tene un charla hopi conmovedor na unda ela conta con e mes a bringa sobrepeso y a cuminsa come saludable. Esaki a sirbi como drive pa sigi cu e estudio Voeding y Dietetiek y asina por yuda otro hende pa tene cuenta cu nan cumin-da.
Mescos cu tabata e caso na e encuentronan anterior Minister Yrausquin a tuma tempo pa a pasa na cada mesa y a sinta papia y scucha loke e studiantenan tin di bisa riba nan bida como studiante. Hopi topico a keda trata di cual Minister Yrausquin lo bai pone nan den un plan di accion pa brinda mas sosten na nos studiantenan.
Banda di e dialogo cu Minister Yrausquin tambe demas staf y personal di Arubahuis a papia cu e studiantenan. Asina ta cu directora di Cas di Aruba Shandra John a elabora cu e studiantenan riba e websitenan cu ta existi unda tin vacaturanan na Aruba. Gabriel de Mey, cu ta corre stage na e departamento di Union Europeo na Cas di Aruba a papia riba e posibilidad di diferente pro-grammanan cu ta existi cu por duna guia na personanan cu kier cuminsa cu nan mesun negoshi. Ta asina cu Union Europeo ta brinda sosten pa stimula entrepeneurship.
Na final e studiantenan a bai cas satisfecho di por a intercambia cu e minister riba nan pre-ocupacionnan y tambe nan a gradici e mandatario pa su dedicacion y e invitacion.
