Desaroyo positivo di Nos Turismo ta un responsabilidat di nos tur: Kampaña di konsientisashon “Asina Nò” di CHATA mester ta un ‘wake-up call’ pa henter komunidat

Desaroyo positivo di Nos Turismo ta un responsabilidat di nos tur: Kampaña di konsientisashon “Asina Nò” di CHATA mester ta un ‘wake-up call’ pa henter komunidat

WILLEMSTAD: E siman aki CHATA a lansa e kampaña di konsientisashon i e promo-video “Asina Nò”, den kual CHATA ke spièrta komunidat riba e akshonnan ku ta dañino pa nos turismo. Desaroyo positivo di Nos Turismo ta un trabou den konhunto. Kòrsou su produkto turístiko tin un potensial enorme, pero no ta nos tur ta rekonosé esaki. Di akuerdo ku Presidente i CEO di CHATA, Miles Mercera, e reakshon pa ku e video tabata hopi positivo. “Nos tabata konsiente ku e video aki lo a ‘move’ nos komunidat; esei tabata e intenshon tambe. E kantidat enorme di ‘share’ i ‘view’ ku e video a risibí riba social media só, ta duna nos speransa ku e mensahe lo yega serka tur ku ta purba stroba nos turismo di progresá. Nos ta gradisí tur medio di komunikashon ku tambe a kompartí e video uniendo forsa ku CHATA i su partnernan pa konsientisá nos komunidat riba e tópiko.”

E kampaña “Asina Nò” mester inspirá nos na un aktitut mas kordial. Nos mester komprometé na kambio, sali for di e zona di komfortabilidat i eksihí ku tur stakeholder ta hasi igual. Mester atendé seguridat di turistanan i pèrkurá pa nan eksperensia na Kòrsou keda unu bunita i inolvidabel. Tambe e promo-video mester hasi nos konsiente di nos responsabilidat pa limpiesa di nos isla pa di e forma ei mehorá eksperensia di e turista i pa eksihí un gobièrnu ku ta pone turismo riba nan lista di prioridat. Turismo ta un di e pilarnan di mas importante di nos ekonomia i tòg ta un di esnan ku mas ta wòrdu neglishá. No únikamente gobièrnu mester duna turismo mas importansia, pero tambe aloká mas fondo pa e industria.

Ku e kampaña di konsientisashon “Asina Nò” CHATA ke konfrontá komunidat ku e realidat i e konsekuensianan, si mantené e aktitut aktual ku bishitantenan di nos pais. Turismo ta benefisiá nos tur i si e situashon keda asin’aki, nos lo mira ménos bishitante i ménos estadia ku lo resultá den un kaida di e kontribushon di turismo den ekonomia lokal. Esaki lo nifiká tambe, ménos kupo di trabou i ménos entrada p’e industria. Mester stòp e ola di violensia ku a infiltrá den industria turístiko mesora! CHATA tin e konvikshon ku e mensahe lo yega na komunidat, pa huntu nos pone un paro na tur loke ta negativo den nos industria turístiko.