MCB, e banko lider den inovashon ta ‘upgrade’ pa Bankomatiko Contactless Smart Card

April 19, 2017 REDAKSHON

Willemstad – Maduro & Curiel’s Bank (MCB) e banko mas grandi i lider di inovashon den karibe hulandes, ku tin un aliansa largu i sólido ku MasterCard Worldwide, ta anunsiá ku orguyo ku MCB ta e promé banko ku ta ‘upgrade’ e Bankomatiko Smart Card pa Bankomatiko contactless Smart Card.

Na aña 2010 MCB tabata e promé banko den karibe hulandes ku a introdusí e Maestro Smart Card i awe 7 aña despues MCB un biaha mas ta e promé banko den karibe hulandes ku ta agregá e opshon Contactless” na e Bankomatiko Smart card. E Bankomatiko Contactless Smart Card ta usa e teknologia di chip Near Field Communication (NFC) ku ta komunika ku mashinnan “Point of Sale” (POS) rònt mundu ku ta aseptá transakshonnan Maestro contactless.

Ora hasi uso di Bankomatiko Contactless Smart Card na e terminal di POS ku ta aseptá transakshonnan Maestro contactless no ta nesesario mas pa hinka “dip” òf swaip bo tarheta. Awor bo tin e opshon pa hasi un pago contactless dor di simplemente tene bo karchi serka di e “reader” di e terminal di POS i bo ta skucha un “beep” òf mira un lus na e pantaya di e terminal di POS ku ta sende pa konfirmá ku e transakshon a keda kompletá. Kompranan contactless ekivalente na NAf. 45,- òf menos ta keda hasí masha lihé sin PIN i kompranan contactless entre NAf. 45,- i NAf. 100,- bo mester hinka bo PIN. Pa kompranan riba NAf. 100,- semper e kliente mester “dip” su karchi den e “reader” di e mashin di POS i hinka su PIN. No opstante ku tur karchi tin e opshon di contactless, e kliente semper tin e opshon pa “dip” òf swaip su tarheta pa kompletá e transakshon manera semper e kliente ta kustumbrá.

Pagonan contactless ta birando hopi popular rònt mundu pasó e ta e forma di pago fásil, lihé i sigur. E teknologia aki ta birando tur dia más popular bou di negoshinan ku ta rekerí pa e proseso di pago ta mas rápido. Algun ehèmpel di negoshinan ku lo benefisiá di e teknologia di contactless ta entre otro panaderia, restorantnan fast food, bar i teatronan. Banda di esei e ta agregá mas seguridat na uso di tarheta paso e kliente no ta kore e riesgo di bai laga su tarheta atras paso e lo ta den su posishon nan tur momento.

E Bankomatiko Contactless Smart Card ta kuminsá drenta merkado den e di dos kuartal di 2017. Bo ta rekonosé e Bankomatiko Contactless Smart Card na e símbolo contactless rèks ariba parti dilanti di e tarheta. MCB ta premirá ku e ta kuminsá saka terminalnan POS pa komersiantenan den karibe hulandes ku por kuminsá aseptá pagonan Maestro contactless pa mitar di 2017.

Bankomatiko Contactless Smart Card por keda usá pa transakshonnan contactless rònt mundu kaminda Maestro ta aseptá i tin un terminal di POS aktivá pa efektuá contactless sinembargo e teknologia ta hopi mas komún na Europa kaminda pagonan contactless ya ta hopi usá.

Pa rekonosé e komersiantenan kaminda pagonan Maestro Contactless ta aseptá klientenan mester wak pa e logo di Maestro den kombinashon ku e símbolo di contactless na e terminal di POS. Pa kualke pregunta tokante di MCB Bankomatiko Contactless Smart Card por tuma kontakto ku nos na 466-1111.