KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

NOTISIA

HENSLEY KOEIMAN; “SKARSEDAT DI MAESTRO, UN PROBLEMA SERIO”

HENSLEY KOEIMAN; “SKARSEDAT DI MAESTRO, UN PROBLEMA SERIO”

WILLEMSTAD – Aktualmente nos tin un skarsedat alarmante di maestro den enseñansa di fundeshi. E skarsedat aki tin konsekuensia serio pa kalidat di enseñansa pa motibu ku hopi lès ta kai afó. Alabes hopi lès ta ser duná pa dosentenan ku no ta kompletamente outorisá.
E situashon aki ta un peso èkstra pa e maestronan ku ya kaba ta funshonando den situashon difisil di trabou. Direktivanan di skol i e sindikato di trahadónan den enseñansa, SITEK, pa basta aña ta batiendo bèl serka e ministernan di enseñansa di último añanan pa hala nan atenshon riba e situashon aki. Na hopi okashon a urgi gobièrnu pa bin ku un plan struktural i duradero pa atendé ku e problemátika di skarsedat di dosente.
Konsiderando e importansha pa nos tin sufisiente maestro bon prepará i ku ta funshoná den sirkunstanshanan di trabou adekuá pa guia nos muchanan den un sistema di enseñansa nobo, dirigí riba desaroyo sostenibel i duradero di nos komunidat, ta imperativo pa nos dediká atenshon spesial na importansha di e profeshon di dosente.
Den e kuadro aki Sr. Hensley Koeiman, i su tim di sosten den enseñansa a instituí e grupo di trabou “Aspektonan Posishon Hurídiko” ku ta konsistí di representantenan direktivanan di skol i representantenan di Ministerio di Enseñansa, Siensia, Kultura i Deporte (ESKD) pa den e kuadro di e kombenio ku a ser firmá ku SITEK tokante sirkunstanshanan di trabou, drecha kondishonnan di trabou di maestronan di skol.
Tarea prinsipal di e komishon aki ta pa sòru pa ehekushon di e palabrashonnan den e kombenio ku tin di haber ku drechamentu di posishon hurídiko di e personal den enseñansa na un manera efektivo pa asina yega na un mehorashon visibel di e posishon hurídiko di personal den enseñansa na Kòrsou. Tambe a instalá un grupo di trabou ku mester hasi un inventarisashon di e kantidat di maestronan ku tin mester pa e añanan benidero i tambe e aporte di e institutonan di preparashon di maestro den e kuadro aki pa bin ku rekomendashonnan pa atendé ku e problemátika di skarsedat.
E intenshon ta pa introdusí sistemanan nobo pa evaluá e kalidat di nos dosentenan i e forma di rekapasitashon kontinuo i bin ku insentivonan pa maestronan ku ta funshoná bon. Pa kombatí e skarsedat direkto di maestro, tambe lo mester bini ku sistemanan nobo di preparashon di dosente i kampañan di informashon i konsientisashon pa hòbennan interesá mas pa bira dosente.
Di e manera aki Sr. Hensley Koeiman den korto tempu ku el a sirbi komo Minister di Enseñansa, Siensia, Kultura i Deporte (ESKD) a duna un aporte signifikativo pa atendé e problema di skarsedat di maestro i tambe traha na drechamentu di sirkumstanshanan di trabou di maestronan di skol.

639114718427035"
639114718427035"