Hensley Koeiman:“Trahadónan den Enseñansa Públiko (DOS) dentro di poko por laborá komo un instansia independiente”

Hensley Koeiman:“Trahadónan den Enseñansa Públiko (DOS) dentro di poko por laborá komo un instansia independiente”

WILLEMSTAD – “Pa basta aña kaba Servisio i Atministrashon pa Enseñansa Públiko (DOS) ta den un problema serio pa por atministrá skolnan públiko na e manera ku lei ta preskribí. A konsekuensia di esei, tantu e trahadónan den enseñansa di skolnan públiko, komo e muchanan tabata sufri bou di e sirkunstansianan ku mester a duna i risibí lès. Banda di esei, e empleadonan públiko ku ta traha na e servisio ei, pa e motibu ei tambe tabata sufri inesesario.”

Eks-Minister Hensley Koeiman, den e 53 dianan ku e tabata responsabel pa enseñansa, huntu ku su tim di sosten, a analisá e situashon i a inkorporá e profeshonalnan na DOS mes pa huntu traha i presentá un plan pa independisá e servisio i atministrashon di skolnan públiko, DOS.

E sindikato ABVO, representá pa su presidente sr. Wendy Calmes a duna su bendishon na e proseso, firmando un protokòl ku eks minister Koeiman, den representashon di DOS, ku ta hasi posibel ku e servisio i atministrashon di skolnan públiko den un futuro serkano lo por hasi nan trabou di un forma mas efisiente.

Den kuadro di esei, e servisio i atministrashon di skolnan públiko lo bai funshoná mas mihó komo un direktiva di skol, ku su propio direktiva. Di manera ku nan lo por suministrá tantu e skolnan, komo alumnonan un mihó servisio posibel.

Sr. Koeiman mas a leu a informá ku e trahadónan na DOS, pa años tabatin problemanan ku nan posishon hurídiko. “A base di e protokòl ku a firma, e trahadónan mes mester tin partisipashon den e proseso di independisashon di nan servisio, ku monitoreo i guia di nan sindikato. Ta bon informá tambe ku tur trahadó ta keda ku nan status di empleado públiko.”