Oferta Carl Camelia Bachelor di Polis GRATUITO


Señor mr. Carl Camelia pa medio di su abogado mr. Bertie Braam, a manda ayera 20 di Aprel un karta pa minister di Hustisia di Korsou, bisando ku e no a haña niun reakshon di e mandatario riba su karta di 5 di Aprel di 2017, kaminda ela puntra e mandatario ten kon leu ICUC International B.V. òf su direktor mr. Carl Camelia lo a haña sea kompletu òf parsial, sèn di e presupuesto di 5 aña di 5.6 miyon pa e estudio di Bachelor di Polis.
Mr. Carl Camelia pa via di su abogado ta sigui bisa e mandatario di Hustisia ku e hecho ku e minister no a reakshoná ta hiba nan na e konklushon ku Carl Camelia ni ICUC International B.V. no a risibí nada di sèn relashona ku e Bachelor di Polis.

Den e karta mr Carl Camelia ta sigui bisa e minister di Hustisia ku durante su 37 añanan ku ela traha den Enseñansa, semper ela sirbi interes di su studiantenan, i asina entre otro NIUNKA a pidi nada di sèn pa ela yuda niun studiante ku “bijles” òf ku nan “scriptie”. Esaki tur studiante ku a haña lès serka mener Camelia sa i te awe e ta yuda studiantenan ku ta studia na otro institutonan na Kòrsou.

Mr Carl Camelia ta bini ku ”an offer you can’t refuse” pa minister di Hustisia ku ta enserá ku pa motibu di su amor pa patria i e oumento espantoso di kriminalidat na Korsou, señor Camelia ta dispuesto pa bolbe kontribuí na desaroyo di su pais i ta ofresé gobiernu pa e organisá i dirihí e estudio di Bachelor di Polis GRATUITAMENTE. Esaki kier men ku sr. Camelia lo NO kobra pa e trabou ku e ta hasi i ku ta solamente gastunan fuera di su persona manera gastunan di otro dosente, material, ets., lo keda kubrí pa gobiernu.
Pa kontrolá esaki Sr. Camelia ta proponé pa nombra un Registeraccountant sea komo parti di un organo di supervishon of no, ku lo chèk pa niun sèn no bai pa Sr. Camelia.

Mr. Carl Camelia ta spera di tende dentro di 5 dia e biaha aki si di e minister di Hustisia si e ta asepta e oferta i asina por kuminsa ku un estudio di Bachelor di Polis di kalidat haltu pa nos polisnan meskos ku tur país tambe ta disponé di dje.
Ku esaki mr. Carl Camelia alabes ke demonstrá ku e NO a haña i no kier haña niun sèn pa e Bachelor di Polis.

Atentamente
Mr. Carl Camelia

Advertisements