KOMUNIKADO DI KUERPO POLISIAL KÒRSOU Un detenshon mas den e kaso di ladronisia ku violensia ku morto na Kaya Hematita. Detenshon a tuma lugá na sala di salida na aeropuerto.
KOMUNIKADO DI KUERPO POLISIAL KÒRSOU
149 / 2017
9 mei 2017
Un detenshon mas den e kaso di ladronisia ku violensia ku morto na Kaya Hematita
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ
Djamars 9 di mei 2017, alrededor di 15.28 or, polis a detené un sospechoso mas den e kaso di ladronisia ku violensia ku morto na Kaya Hematita, kual a tuma lugá dia 3 di aprel último (komunikado di prensa 101/2017). Detenshon a tuma lugá na sala di salida na aeropuerto. Ta trata di e hòmber: S.J.R. nasé na Kòrsou di 21 aña di edat. A presentá e sospechoso dilanti un fiskal ouksiliar ku a ordená su enkarselamentu pendiente mas investigashon. Esaki ta e di dos detenshon den e kaso ariba menshoná. Dia 12 di aprel 2017 polis a detené e promé sospechoso den e kaso aki na un kas na Kaya Ehèmber (komunikado di prensa 120/2017). Investigashon den e kaso ta kontinuá.
Kuerpo Polisial ta yama danki na pueblo di Kòrsou pa nan kooperashon, manera nos a hasi un apelashon den komunikado di prensa 140/2017, pa asina por yega na solushon di e kaso aki i otro kasonan pendiente. Nos sa ku nos por sigui konta ku bo(so) kooperashon. Huntu nos ta logra un mihó Kòrsou.
