Diskurso di Su Ekselensia señora L. George-Wout, Gobernador di Kòrsou, di 11 di mei 2017 na okashon di huramentashon di miembronan di Parlamento di Kòrsou despues di e elekshon di dia 28 di aprel 2017.

Diskurso di Su Ekselensia señora L. George-Wout, Gobernador di Kòrsou, di 11 di mei 2017 na okashon di huramentashon di miembronan di Parlamento di Kòrsou despues di e elekshon di dia 28 di aprel 2017.
________________________________
Damas i kabayeros,
Durante un seremonia dia 2 di novèmber 2016 miembronan nobo di Parlamento a huramentá despues di e elekshon konvenshonal di dia 5 di òktober 2016. Awe nos tin un seremonia di huramentashon atrobe. Awor, despues di e delaster elekshon ku a tuma lugá dia 28 di aprel 2017.
Ounke e elekshon akí a bini pa tur hende ònferwagt, e elekshon a desaroyá denter di kuadro di lei. E forma ku e elekshon a kana tambe tabata finalmente trankil i na òrdu, loke ta nifiká un diploma di kompetensia meresí pa Kòrsou! Siudadanonan di Kòrsou a demostrá ku nan ta bon konsiente di e responsabilidat ku kada ken tin pa ku e derecho di voto. Den e kuadro aki lo mi informá gobiernu di Reino ku e desishon pa otorga Gobernador e outoridat pa ehersé e responsabilidat pa organisá e elekshon, por kaduka.
Sin embargo, den e periodo tras di lomba a resultá ku nos sistema konstitushonal, ounke e ta robusto, tòg tin nesesidat di fortifikashon.
Hiba nos demokrasia parlamentario na un nivel mas haltu di konfiabilidat i stabilidat, ta rekerí un evaluashon honesto di e leinan i reglamentu ku ta karg’é. E último periodo a tira lus riba inklaridat i kontradikshon den e sistema, prinsipalmente pa loke ta e situashonnan ku nos no a premirá, i ku a hiba nos na preguntanan konstitushonal i na retonan indeseabel. Mi ta referí aki tantu na Konstitushon, Reglamento di Votashon komo na boso propio Reglamentu di Òrdu. Ta toka boso komo Parlamento pa, huntu ku gobiernu, trese kambio den esaki.

Awe nos ta den e sala akí, kaminda hopi miembro a pasa promé ku boso, pasobra siudadanonan di e pueblo akí a duna boso nan konfiansa. Konfiansa ku boso komo nan representante ta vigilá nan interes, den e konteksto di interes general, deliberadamente i di un forma respetuoso.
Nos Konstitushon ta representá e historia riku di demokrasia parlamentario den Reino. Esaki ta e kaso tambe ku e teksto di e huramentu òf e promesa ku boso lo presta awe. E huramentu òf e promesa akí boso ta ekspresá aki na Palasio, pero hasiendo esaki boso ta dirigí boso na siudadanonan di Kòrsou i boso ta primintí di sirbi bienestar di tur siudadano. P’esei e seremonia akí no ta solamente festivo, sino tambe solèm.
Parlamento tin un ròl propio i esensial den gobernashon di pais. Preámbulo di Konstitushon ta bisa: Nos gobièrnu, nos Parlamento i nos poder hudisial ta pilánan pa un desaroyo positivo i sostenibel di nos pais. Tres pilá, kada un ku su propio tarea ku ta indispensabel i intransferibel.
Tarea di Parlamento komo sosio krítiko di gobièrnu di pais ta eksigí di su miembronan empatia pa nesesidat di siudadanonan, pero tambe un toma di konsenshi di kiko ta e límitenan di e posibilidatnan di gobièrnu. T’asina ku e presupuesto di gobièrnu, no ta sin límite. Ta un biaha so por saka kada florin.
Ta Parlamento tin e responsabilidat komo kontrapartida di gobièrnu, di kontrolá si gobièrnu ta tene kuenta ku e diverso interesnan di komunidat. Si gobièrnu ta pisa e alternativanan, si ta skohe nan bon pensá i si ta sali pa e hendenan mas débil di nos komunidat. Den esaki Parlamento tin un papel aktivo. Parlamento ta e órgano ku ta kontrolá di antemano e gastunan proponé pa gobièrnu. Parlamento ta huzga despues tambe e gastunan real ku a hasi.
Ademas, Parlamento tin un ròl importante ante e siudadano. Ta tarea di Parlamento tambe, pa informá e siudadano ku frankesa tokante e komplehidat di interes general. Pa tal motibu, si tin diferensia di opinion esensial na ora di disidí riba un propuesta, ta na su lugá pa resolvé esaki analisando kontenido di e diferensianan i ku mira pa e interes general.
Dia 5 di aprel 2013 Parlamento a rekordá e echo partikular ku Kòrsou konosé un representashon di pueblo 75 aña kaba; entre tantu 7 aña komo pais. P’esei boso ta forma parti di un kadena di responsabilidat sosial ku ta wordu kargá di generashon pa generashon.
Ser miembro di Parlamento ta un honor. Boso trabou ta pone e fundeshi pa fortifikashon di nos estado di derecho demokrátiko i ta promové bienestar di tur siudadano.
Mi ke termina rekordando nos tur, ku e ultimo palabranan di e Preámbulo di Konstitushon di Korsou ta bisa: “……pasobra bendishoná ta e pueblo ku tin Dios komo su Señor. Nos lo uni forsa i, den igualdat i na pas, sirbi nos pais ku amor.”
Hopi forsa i éksito den realisashon di e tarea importante akí pa kua pueblo di Kòrsou a duna boso e mandato.

This site uses Akismet to reduce spam. Learn how your comment data is processed.

error: Content is protected !!
%d bloggers like this: