E seminario “Learn the new rules of Money” ta tuma lugar na Tropical Hotel and Entertainment Center na Rio Canarioweg di 7.30 p.m. – 10.30 p.m.. Entrada ta gratis.

Diahuebs 18 di mei , Jewel Tankard, un fenomenal i eksitoso empresario, reverendo, autor, motivado, talk show host, artista, eksperto finansiero i mionario Merikano ta na Korsou den un seminario uniko, edukativo i balioso pa tur esnan ku ta interesa pa yega na logronan ekstra-ordinario den bida. E seminario “Learn the new rules of Money” ta tuma lugar na Tropical Hotel and Entertainment Center na Rio Canarioweg di 7.30 p.m. – 10.30 p.m.. Entrada ta gratis. E charla ta pa tur persona ku ta desea di tin logronan finansiero duradero i ekstra-ordinario, mas amor propio, sinja konose su propio potensial i pa logra eksito i tur meta.
Jewel ta mama di 5 yu, pero apesar di esei el a logra masha hopi atrabes di su karera profeshonal. E ta un eksperto finansiero, artista prinsipal den e seri di televishon “Thicker than water” i ta kasa ku Ben Tackard ku ta un empresario super eksitoso, un reverendo ku ta tambe miembro di un banda ku ta toka musika di gospel jazz.
Jewel ta hasi uso di mensahenan spiritual uniko pa demostra e hende muher kon pa logra eksito komo profeshonal i personal. Den negoshi di Ardyss el a logra inskribi mas ku 65.000 miembro i tabata tin e benta di mas haltu di US$ 2 mion den e organisashon.
Jewel ta duna tayer i charla di motivashon ku ta stimula kada partisipante pa logra nan sonjonan. El a skirbi e buki “Jewel Tankard’s jumpstart: Quick tips for wealth building” ku a guia personanan ront mundu di logra un posishon finansiero solido of nan propio negoshi. Den e tayernan e ta duna instrukshon na un forma spiritual kon pa jega na tur loke bo ta desea. Tur loke bo ta desea ta posibel segun Jewel, basta bo tin e technika i forma di pensa korekto. Un kantidat grandi di persona ku a sigi su training, seminario i tayernan a logra nan libertat finansiero.
Jewel a kuminsa ku su propio kolekshon di mensahenan positivo i di motivashon graba riba asesorio i kusinchi ku ta trese kambionan fundamental interesante serka donjo di e opheto. Komo miembro di direktiva di Rutherford County Domestic Violence Shelter na Murfreesboro, Tennessee, USA, e ta empodera hendenan muher abusa, pa nan por para fuerte den nan propio sapatu i bira independiente.
Jewel ta stima humanidat, e ta hopi kreyente i ta semper para kla pa asisti i guia otro persona, ku enfasis riba e sekso femenino ku ta mas vulnerabel. Jewel su filosofia di bida ta “You Can Have It All”!!
Tur esnan interesa tin e oportunidat uniko pa topa ku Jewel Tankard durante di e seminario di diahuebs 18 di mei. E seminario ta na ingles i tantu e sekso femenino komo maskulino ta bonbini.