Orashon djaluna 5 di yüni 2017
Orashon djaluna 5 di yüni 2017
Hesus a kuminsá papia ku nan pa medio di parábola i a konta nan: ‘Un dia tabatin un hòmber ku a planta un hòfi di wendrùif. El a ser’é ku un tranké, traha un baki pa fangu djus di e wendrùif ku machiká. Tambe el a traha un toren di vigilansia. Despues el a hür e hòfi ku algun kunukero i sali di biahe. Den tempu di kosecha, el a manda un kriá bai tuma su parti serka e kunukeronan. Sinembargo e kunukeronan a kohe e kriá dun’é un halá di sota mand’é bai man bashí. E doño a bolbe manda un kriá serka nan; nan a dal e kriá akí na su kabes i maltrat’é. E doño a manda un otro kriá; esun akí nan a mata. Asina nan a sigui hasi ku tur otro kriá ku tabata bini; nan tabata bati algun i otro nan tabata mata. A sobra e doño su yu stimá so pa manda i por último e doño a mand’é serka nan. El a pensa: “Mi yu sí nan lo respetá!” Ma e kunukeronan a bisa otro: “Esun akí ta e heredero! Ban, laga nos kaba kuné, ya nos ta haña su herensia!” Nan a koh’é tene, mat’é i tir’é despues pafó di e hòfi. Kiko doño di e hòfi lo hasi awor? E mes lo bin kaba ku e kunukeronan i pasa su hòfi pa otro hürdó. Nunka boso no a mira den Skritura ku tin skibí: E piedra ku e trahadónan a rechasá, a bira piedra prinsipal; ta trabou di Señor esei, algu milagroso pa mira!’ E saserdotenan importante, e dòktornan di lei i e ansianonan tabata sa ku ta di nan e komparashon tabata trata. P’esei nan ker a kohe Hesus prezu, ma nan tabatin miedu di e multitut; nan a bai lag’É.
Marko 12:1-12
