Gilbert Doran Sr.: Ta tumando akshon òf ta warda ora baka hoga na pos?

Tumando nota di e anunsio di e tormenta tropikal Bret ku ta biniendo den nos direkshon i ku tur probabilidat nos lo sinti su efekto nan basta fuerte, mi ke hasi pregunta na nos Minister di Salubridat i VVRP pa sa den ki kondishon nos roi nan ta i tambe dam nan ta. Sigur den bario nan ku ta super vulnerabel pa soportá kaida di awa na gran eskala.
Den e kaso aki ma pasa tira bista den área di saliña. Pa mi sorpresa desagradabel ma tuma nota ku e roi pega ku Panaderia Majestic ta totalmente kohestiona ku palu i asuntu nan ku nos por denominá komo porkaria.
Pregunta: Ta tumando akshon òf ta warda ora baka hoga na pos?
Na ami su pareser prekoushon no a ser tuma pa e instansha nan konserní. Mi petishon ta bai na e Ministernan enkargá ku Salubridat i VVRP pa por fabor, aunke ya mañan ta lat pa tene esaki na kuenta. Barionan ku tin mi preokupá ta: Saliña, Zeelandia, Groot Davelaar i Koraal Specht prinsipalmente, pero Kòrsou en general.
Nos ta sperando un tormento tropikal di rafaganan di bientu di 20, ku lo subi bai 50 i por alkansá asta 75 km pa ora. I awa seru entre 50 mm pa 75 mm. Pues nos ta papia di un kantidat basta pisa. Por fabor ban konsiderá i no tuma e asuntu aki suave!

Atentamente,
Gilbert Doran Sr.
Parlamentario

This site uses Akismet to reduce spam. Learn how your comment data is processed.

error: Content is protected !!
%d bloggers like this: