Reunion di Komishon Sentral pa trata leinan, ku lo ta medida kontra di pueblo di Kòrsou i ku lo kontribuí na mas problema pa Kòrsou

Na Presidente di Parlamento di Kòrsou

Señor W. Millerson

Wilhelminaplein

Presente

 

Kòrsou, 26 di ougùstùs 2019,

Tópiko: Reunion di Komishon Sentral pa trata leinan, ku lo ta medida kontra di pueblo di Kòrsou i ku lo kontribuí na mas problema pa Kòrsou

 

Señor Presidente,

 

Frakshon di MFK ta aserka bo persona, ku lo siguiente;

Djabièrnè último Parlamento a risibí un kantidat di kambio di lei, kual mester ser trata djaluna den un reunion di komishon sentral. E proposishon di e diferente kambionan di lei, ni sikiera a ser registrá na Parlamento.(artíkulo 22 RvO)! Frakshon di MFK, ta lamentá, ku e leinan ku nos a risibí ta hopi slordig presentá.

Frakshon di MFK, ta kuestioná e echo, ku e konseho di SER, fecha 1 di yüli 2019, ku number di referensia 070/2019-SER, a ser tené atras i a mandá esaki awor numa pa Parlamento. E konseho aki ta devastador i manera un ladron den anochi, gobiernu kier pa bai hinka man den saku di pueblo di Kòrsou apesar di e konseho aki di SER.

Manera ya menshoná frakshon di MFK a tuma nota, ku e konseho di tantu SER komo esun di RvA, riba e kambionan proponé, ta devastadó i tin konsekuensia, pa klima di invershon, pa kosto di hasi negoshi, pa Komersio i Industria, pero tambe pa e konsumidó (Lesa Pueblo di Kòrsou).

Frakshon di MFK ta lamentá ku gobièrnu di Kòrsou, NO a konsulta ku tur aktor den nos komunidat promé ku trata di pasa e proyekto di leinan aki den Parlamento. Ta dal gobièrnu ke dal bai, pa dal komunidat ku medidanan ku lo bai tin komo konsekuensia, mas pèrdida di kuponan di trabou, redusí ainda mas e forsa di kompra, kresementu di inflashon, stimulashon di kontrabanda i huida di kapital!

Frakshon di MFK, a base di e ariba menshoná ta sugirí bo persona, pa tene kuenta ku e atvertensianan ariba menshoná i pa e medidanan aki no trese disturbio den nos komunidat.  Frakshon di MFK ta di opinion, ku mester tene ròndu di konsulta mas profundo i ku tur aktor den nos komunidat (Komersio, Industria i Sindikalismo). Pa asina trata na yega na alternativanan ku lo no ta funesto pa ekonomia i pa Kòrsou.

Pa finalisá frakshon di MFK, ta bisa ku ku keda sin bai mesa di negoshashon i diálogo, ta buskamentu di problema di parti di gabinete Rhuggenaath. Frakshon di MFK kier felisitá SER, RvA i KvK ku den nan konsehonan na gobiernu ta indiká bon kla na gobiernu ku e medidanan aki lo no kontribuí na un solushon pa e problemanan ku Kòrsou ta pasando aden. Meskos ta bai un felisitashon na sindikatonan i sentralnan di sindikato ku tambe a mustra riba konsekuensianan di e medidanan aki.

Frakshon di MFK ta pone gabinete Rhuggenaath, responsabel pa tur konsekuensia ku e medidanan aki lo trese den komunidat.

Na nòmber di Frakshon di MFK,

Gilmar Pisas

Lider di Frakshon pa MFK

 

P.S.

 

Frakshon di MFK, ta pidi pa haña e siguiente dokumentunan, promé ku e reunion di djaluna di 26 di ougùstùs 2019;

 

–           Reakshon di gobièrnu di Kòrsou riba konseho di SER

–           Presupuesto 2019

–           Kuentanan anual 2015- 2018 di Selikor NV

–           Konseho di Duana, DEZ, Finansa i Inspekshon di Impuesto, riba e

diferente kambionan di lei proponé

–           Lista di “Stakeholders”, ku gobièrnu a papia kuné

 

Frakshon di MFK ta pidi Bo persona ku pa efisiensia i pa evitá diskushonnan innesesario i pa un debate na nivel, pa bo persona komo presidente di Parlamento tene bon kuenta ku e karta aki.