Domeinbeheer ta formalisá okupashon ilegal te kaminda lei i maneho ta pèrmití

Teniendo kuenta ku e aspekto sosial humano:
Domeinbeheer ta formalisá okupashon ilegal te kaminda lei i maneho ta pèrmití

Willemstad – Awe ta hasi nèt un aña ku Domeinbeheer a inisiá e proyekto “Tereno pa Tur, pero na òrdu sí”. Domeinbeheer por wak bèk riba un aña kargá ku akshon kontra di okupashon ilegal. Prinsipalmente mas komunikashon ku pueblo di Kòrsou tokante maneho di gobièrnu pa ku okupashon ilegal di tereno i e posibilidatnan ku tin pa formalisashon.

Na tur, Domeinbeheer a organisá 8 seshon di bario rònt Kòrsou den kuadro di e proyekto Tereno pa Tur ku e meta pa informá tokante okupashon ilegal di tereno di gobièrnu i e posibilidat ku maneho ta brinda pa formalisá e uso di tereno. A splika na tur persona ku a bishitá e seshonnan aki ku mester evaluá kada kaso individualmente, ya ku niun kaso no ta meskos. Den kuadro di esaki mester tene kuenta ku por ehèmpel e echo ku gobièrnu no ta formalisá okupashon ilegal di tereno di gobiernu ku a tuma lugá despues di 1 di òktober 2015.

Domeinbeheer a konstatá diferente petishon pa formalisashon di terenonan ku ta pará bashí sin ningun konstrukshon ariba. Ta bon pa pueblo di Kòrsou ta na altura ku Domeinbeheer por mira den sistema di satélite presis kiko tin riba e tereno i den kua temporada tabatin sierto kambionan, sea di limpiesa di e tereno òf ku a pone konteiner òf kualke otro opheto ariba. Domeinbeheer su maneho no ta pèrmití pa formalisá tereno ku ta okupá di forma ilegal sin konstrukshon ariba. Tampoko no ta hasi distinshon den formalisashon di terenonan bashí promé òf despues di 1 di òktober 2015. Den ningun di e kasonan menshoná aki formalisashon ta posibel.

Domeinbeheer kier pone énfasis riba e echo ku okupashon di tereno di gobièrnu sin pèrmit no ta algu legal, pero teniendo kuenta ku e aspektonan sosial humano gobièrnu ta formalisá te kaminda lei i maneho ta permití. Pa e motibu aki mes Domeinbeheer ta splika tur petishonario eksplísitamente ku no ta den tur kaso formalisashon ta posibel.

Konsekuensia di okupashon ilegal pa pueblo
Domeinbeheer ta konsiente ku tin un lista di espera largu pa tereno i ku hopi hende a opta pa warda hopi aña pa haña un tereno di un forma legal. Aktualmente ta trahando hopi duru pa baha e tempu di espera aki. Sinembargo, mester tene na kuenta ku e kantidat di okupashon ilegal tin su konsekuensianan pa pueblo. Tur e terenonan di gobièrnu ku ta okupá di forma ilegal ta tereno ku Domeinbeheer por a emití na e personanan ku hustamente ta riba lista di espera. Pues, ta bon pa pueblo ta konsiente ku okupashon di tereno di forma ilegal no ta perhudiká planifikashon di bario, infrastruktura, agrikultura lokal èts só, prinsipalmente e ta perhudiká tur e personanan ku ta wardando riba lista di espera tambe. Esaki riba su mes kaba ta un motibu bálido dikon Domeinbeheer no ta legalisá tereno bashí. Otro konsekuensianan negativo di okupashon ilegal ta ku ta krea peliger pa habitantenan di kas, ya komo ku ta traha e kasnan sin supervishon i pèrmit di gobièrnu, ta uza tereno di forma inefisiente, ta perhudiká entradanan di gobièrnu, ta stroba plannan di parselashon i ta afektá naturalesa i awanan territorial.

Pa evitá ku e situashon aktual ta sigui sali for di man, e departamentu di Okupashon Ilegal & Mantenshon di Òrdu a bin ta vigilá terenonan di gobièrnu di un forma mas aserka i a duna diferente atvertensia na personanan ku no ta respetá lei i maneho. A duna atvertensia dor di pone alrededor di 100 bòrchi di stòp rònt Kòrsou kaminda ku habitantenan tabata sea basha shushi, konstrui òf planta sin pèrmit riba tereno di gobièrnu. Mester bisa ku a risibí tremendo koperashon serka pueblo di Kòrsou via di notifikashonnan ku tabata drenta tokante akshonnan ilegal via di tantu e página di Facebook komo e liña di telefòn 0800-1919. Domeinbeheer ta sumamente agradesido pa e koperashon aki i ta pidi pueblo pa sigui mèldu pa por atendé ku kada kaso debidamente!

Proseso di formalisashon
Banda di duna informashon, un otro meta importante di e seshonnan ku tabatin den bario durante e último aña tabata pa brinda posibilidat pa personanan ku ta okupando tereno di forma ilegal registrá esaki boluntariamente komo un petishon pa formalisashon. Unabes ku Domeinbeheer risibí e petishon pa formalisashon ta inisiá e prosedura di evaluashon di e kaso. Un kòntrolùr lo tuma kontakto ku e petishonario pa bai wak e tereno i traha un rapòrt di e situashon. A base di e rapòrt lo evaluá internamente si por formalisá si òf nò. Den ambos kaso, Domeinbeheer lo tuma kontakto ku e petishonario pa informá tokante kontinuashon di su prosedura.

Domeinbeheer i e proyekto Tereno pa Tur ta habrí semper pa kontestá kualke pregunta i sigui duna pueblo di Kòrsou e informashon deseá. Pueblo di Kòrsou por yama libremente na e liña grátis 0800-1919 òf por manda un mensahe riba e página di Facebook Tereno pa Tur.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: