Brasami un biaha mas ku un tremendo evento den kuadro di selebrashon di su 20 aniversario

Brasami un biaha mas ku un tremendo evento den kuadro di selebrashon di su 20 aniversario

Anualmente Verslavingskliniek Brasami, mihó konosí den boka di pueblo komo Brasami, ta organisá diferente aktividat pa rekoudá fondo, pa asina nan por logra kubri tur e gastunan di nan programanan. Tur esaki ku e meta pa garantisá rekuperashon optimal di nan habitantenan.

Selebrando Brasami su di 20 aniversario ku nan a kumpli dia 18 di aprel último, Brasami ta organisá un kaminata grandi titulá: Heads-Up! Walk. Esaki lo tuma lugá djadumingu dia 9 di yüli 2017. Ku hopi dedikashon e Fundashon aki i tambe vários boluntario ta organisando e kaminata aki alabes ta invitando henter pueblo di Kòrsou pa partisipá na e kaminata aki. Esaki lo ta un evento úniko, kaminda tur partisipante lo pasa bon i alabes kontribuí na e lucha kontra adikshon di e habitantenan di Brasami.

Karchinan pa e kaminata ta na balor di fl.10,- i ta optenibel na Brasami den oranan di ofisina. Pa reservá bo karchi(nan) i tambe pa kualke pregunta, tuma kontakto libremente ku Brasami via telefòn 4623053.

Tur partisipante lo risibí un armbant komo rekuerdo di nan partisipashon. E armbant aki ta kontené e kolónan, diseño i título di e kaminata.

Durante di e kaminata lo tin diferente pòst kaminda por tuma awa. Na final di e kaminata lo repartí algu di kome i bebe pa kada partisipante. Lo tin un “Heads-Up Wall” kaminda tur presente lo por skibi un palabra di estímulo dediká na nos habitantenan.Tambe na final nos lo tin blas ku helium ku nos lo laga lòs komo señal di éksito pa esnan ku ta luchando ku e malesa di adikshon. I asina ku kabes na laira lo sigui selebrá i pasa un ratu kontentu huntu, kompañá pa un tremendo DJ.

Ku e tremendo inisiativa aki Brasami ke tira un lus riba e problemátika di adikshon i alabes konsientisá nos komunidat ku e lucha kontra adikshon mester di sosten i apoyo di un i tur.
Un gradisimentu ta bai na tur esnan ku ta kooperando ku e gran evento aki.

Komishon di Aktividat
Verslavingskliniek Brasami
Rembrandstraat z/n

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: