E di 71 Miss World a wordu korona

Djasabra 9 di mart último dilanti di un publiko di mas ku 10 mil hende a tuma lugá e gran final di “Miss World”. Un total di 112 beyesa representando paisnan di rònt mundu a kompetí den e di 71 edishon di e prestigioso sertámen di aki kual a tuma lugá na Mumbai, India.

Kòrsou su flamante representante Nashaira Balentin tambe a forma parti di e kompetensha ariba menshona.

For di su yegada na India Nashaira a kosechá hopi éksito pa su manera spontáneo i tambe su abilidat di komuniká.

Aunke ku e kompetensia tabata unu hopi fuerte mirando e kandidat grandi di 112 partisipante kompetiendo pa e titulo máksimo, nos “Miss World Curaçao” Nashaira Balentin” a destaká di un forma tremendo dunando tur di su parti promoviendo nos dushi pais Kòrsou.

E final di e 71 sertámen di “Miss World” a tuma lugá na Jio World Convention Center i a wordu transmití pa mas ku 100 pais. Na final di un show di tres ora un studiante i modelo di Czech Republic “Krystyna Ryszková” di 24 aña a keda koroná komo e di 71 “Miss World”.

ReProD(Reinilla Project Development) na nomber di henter pueblo di Kòrsou ta gradisi Nashaira Balentin pa e bon trabou i ta desea Nashaira tur klase di éksito pa futuro i ta spera ku por sigi konta ku persona.