Hofi Cas Cora ganadó di Premio Komersiante Briante 2017 di Maduro & Curiel’s Bank.
Hofi Cas Cora ganadó di Premio Komersiante Briante 2017 di Maduro & Curiel’s Bank.
WILLEMSTAD – Maduro & Curiel’s Bank a rekonosé Hofi Cas Cora komo ganadó di Premio Komersiante Briante 2017 na un resepshon ku resientemente a tuma lugá na Plasa Jojo Correa durante Punda Thursday Vibes. Premio Komersiante Briante ta un premio ku MCB ta otorgá tur aña na un persona, organisashon òf instituto ku na nos opinion a hasi algu ekstraordinario na benefisio di e sektor di Empresa Chikí òf na un empresa ku a sobresalí na Kòrsou. Komersiante Briante ta nòmber di e símbolo ku ta identifiká Maduro & Curiel’s Bank su Departamentu di Empresa Chikí (Small Business Banking). E símbolo ta un pòpchi ku tin un pera di lus riba su kabes i ta ilustrá e empresario chikí ku ta aserká Bo Banko Amigu ku su idea briante pa su negoshi. Maduro & Curiel’s Bank su Departamentu di Empresa Chikí ta bai e “extra mile “ pa yuda kristalisá e idea aki.
Ku Premio Komersiante Briante, Bo Banko Amigu ta sigui stimulá i tambe konsientisá otronan pa sigui ku nan esfuerso pa e sektor tan importante aki pa nos ekonomia, e sektor di Empresa Chikí. Un komishon di e departamentu di Empresa Chikí di MCB ta hasi investigashon i ta determiná e nominadonan for di kua ta nombra un ganadó apsoluto.
Nominadonan pa Premio Komersiante Briante 2017 ta:
• David Corsen Cakes
• YDK (Yu di Kòrsou)
• Hofi Cas Cora
• De Wind Imaging/ Tula taught me
• Fresku Daily Magazine & Daily.com
• Twizt
• Kuki Monster
• Bar.ber
E ganadó apsoluto di Premio Komersiante Briante 2017 a resultá Hofi Cas Cora di propietarionan Femi Meaux i Joshua Peiliker.
Hofi Cas Cora ta un restorant ku ta usa e konsepto “Farm-To-Table” ku ta nifiká ku tur plato i snèks ku wòrdu sirbí di e restorant tin ingredientenan ku ta bini for di nan propio plantashon. Nan menú ta wòrdu kambiá sigun nan kosechá e ingredientenan den nan kurá. Banda di stimulá pa kome i biba salú, Hofi Cas Cora ta ofresé lès di Yoga pa asina bo kurpa por rekonektá ku naturalesa.
Banda di e trofeo prestigioso di Komersiante Briante Hofi Cas Cora a risibí un premio na balor di NAf. 5.000,-. Ku e premio aki MCB ta duna un empuhe pa Hofi Cas Cora tambe por sigui riba desaroyonan di kome i biba salú i alabes konsientisá otronan pa sigui ku nan esfuerso pa e sektor di Empresa Chikí.
Maduro & Curiel’s Bank ta felisitá tur e nominadonan i Hofi Cas Cora, ganadó di Premio Komersiante Briante 2017. Ku e premio aki di Premio Komersiante Briante Bo Banko Amigu ta ilustrá i enfatisá e importansia di e sektor empresarial pa desaroyo di ekonomia di nos dushi Kòrsou. E sektor aki ta e wes’i lomba di nos ekonomia i MCB ta enkurashá un i tur pa sigui sostené e sektor di Empresa Chikí. Danki tambe na un i tur ku di un òf otro forma ta hasi algu ekstraordinario pa yuda eduká, inová, guia òf sostené nos sektor di Empresa Chikí.
28 di yüni 2017
