Djadumingu mèrdia nan a yega Santiago de CubaGruponan artístiko ta hopi entusiasmá

Djadumingu mèrdia nan a yega Santiago de CubaGruponan artístiko ta hopi entusiasmá     
 
KRALENDIJK – Tur e gruponan artístiko boneriano ku ta partisipá e siman aki na Festival del Caribe, evento kultural ku ta tuma lugá na Santiago de Cuba, ta entusiasmá. Esaki por komprondé di e lidernan di e diferente gruponan ku a yega e pais karibense djadumingu mèrdia ku un buelo charter di e kompania Fly Allways.
Manera ta generalmente konosí kaba, e siman aki e siudat Santiago ta sede di e di trintishete Festival del Caribe, organisá pa e instituto Casa del Caribe, dirigí pa Orlando Vergés. E festival dje aña aki, tambe konosí komo ‘Fiesta del Fuego’, ta dediká na Boneiru.
Gobièrnu di Boneiru a pèrkurá pa un grupo grandi di artista di vários disiplina partisipá na e festival. Ta trata di Grupo Watapana ku muzik krioyo, Grupo Eso ku muzik krioyo i moderno, Grupo Maskarada ku muzik i bailenan teatral, Grupo Tuti Fruti ku muzik i kanto krioyo, Dance Sensation ku dansa moderno, Grupo Folklóriko Bonaire ku dansa krioyo, rei di tumba di Luigi Molina, ganadó apsoluto di festival kanto krioyo Marian Offerman i ganadó apsoluto di e festival ‘Ban kanta nos Boneiru’ Gilberto Martis.
Den entrevista sostené ku tur lider di e gruponan musikal por dedusí ku nan ta kontentu i entusiasmá pa por partisipá na e festival dediká na Boneiru. Nan ke duna lo máksimo den nan diferente presentashonnan. Ta manera Nina den Heyer, diputado di kultura, a deklará den fin di siman na prensa: “Un pueblo chikitu na kantidat di habitante, pero grandi di kurason. E artistanan aki lo bai brinda lo mas mihó ku nan tin.”
Masoménos 110 artista boneriano a biaha den fin di siman pa Cuba pa partisipá na Festival del Caribe. E artistanan ta hospedá den entre otro Hotel San Juan, Hotel Rancho i Hotel Meliá, tambe na algun otro lugá di hospedahe.
Michael Janga, lider di Grupo Watapana, a trese dilanti ku pa nan ta un honor di por partisipá pa promé bia na e festival. Nan ta realmente kontentu ku un integrante di nan, Marcel (Chai) Mercera, ta bai haña un premio kultural ku ‘Casa del Caribe’ ta opsekiá na personanan ku a sobresalí den ramo kultural. Ta trata di ‘Premio Casa del Caribe’. Mercera, ku tambe a yega djadumingu mèrdia, a bisa ku e ta sinti su mes honrá pa por risibí e premio aki.
Di e gruponan ku a yega Cuba djadumingu mèrdia tin tambe Grupo Tuti Fruti, ku dos aña pasá tabata na Cuba kaba, aktuando den Festival den Caribe. Emma Sint Jago, lider di e grupo aki, a bisa ku nan ta kontentu di ta bèk.
 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: