Orashon djamars 4 di yüli 2017

Orashon djamars 4 di yüli 2017

Ora di dia tabata bai habri e angelnan a bisa Lòt: ‘Ban mira! Bai ku bo esposa i ku bo dos yu muhénan ku t’aki, sino bo ta bira víktima di e maldat ku e siudat akí ta hasi.’ Komo e tabata tete tete e hòmbernan a gara Lòt, su esposa i su yunan na nan man i a hiba nan pafó di e siudat, pasobra SEÑOR ker a spar Lòt su bida. Asina nan a yega pafó di e siudat un di e angelnan a bisa: ‘Kore pa bo bida! No wak patras, ni para ningun kaminda den e region akí. Bai den e serunan si boso ke skapa di morto.’ Pero Lòt a bisa nan: ‘Ai nò, mi shonnan. Mi a ripará ku boso ke mi bon i boso a hasi mi un fabor grandi kaba di skapa mi bida. E serunan ta muchu leu. Promé ku mi alkansá nan, mi ta bira víktima di e desaster i mi ta muri. Wak e siudat mas serka ayá, mi por hui bai aya. Ta un siudat chikitu. Laga mi bai aya pa mi skapa.’ E ora ei un di e angelnan a bisa: ‘Ta bon! Lo mi skucha bo un bia mas i kumpli ku loke bo a pidi. Mi no ta destruí e siudat ei. Hasi lihé hui, bai aya mesora pasobra mi no por hasi nada promé ku bo yega aya.’ P’esei nan a yama e siudat Soar. Solo a kaba di sali, ora Lòt a yega Soar. E ora ei SEÑOR a laga suafel na kandela yobe riba Sódoma i Gomora i El a destruí tur e dos siudatnan ku tur habitante i henter e region ku tur loke tabata krese ei. Esposa di Lòt ku tabata kana su tras a drei mira patras i mesora el a kambia bira un pilá di salu. Mainta trempan Abraham a bai e lugá kaminda el a para papia ku SEÑOR; el a wak den direkshon di Sódoma, Gomora i henter e region. Tur kaminda tabatin huma ta sali for di suela komo si fuera ta un fòrnu e lugá tabata. Ora Dios a destruí e siudatnan den e region kaminda Lòt tabata biba, El a kòrda riba Abraham i a saka Lòt for di e lugá ku El a destruí.
Génesis 19:15‭-‬29