Nina den Heyer: Kultura i naturalesa tin prioridat haltu

Nina den Heyer: Kultura i naturalesa tin prioridat haltu

SANTIAGO DE CUBA – “Komo diputado di asuntunan sosial i kultural di Boneiru, ta un privilegio di ta den Festival del Caribe. Boneiru ta un isla chikitu den Caribe. Tambe e ta un musipio spesial di Hulanda desde 10 di òktober 2010.” Esaki diputado Nina den Heyer a bisa den un konferensia di prensa djaluna mainta.
E mandatario a bisa ku situá pegá ku kosta di Venezuela i pegá ku su islanan ruman Aruba i Kòrsou, Boneiru ta un isla spesial i úniko. “Manera su himno ta bisa: hende humilde, pero ku hopi amor pa nan isla. Durante e festival ta bai demonstrá kreatividat, talento ekselente di nos hendenan.”
“Nos ta hopi entusiasmá pa kompartí i hasi interkambio di nos kultura ku esun di boso. Nos a trese mas ku 100 artista boneriano ku ta bai duna presentashon di muzik, dansa i kanto di Boneiru. Nos ta hopi orguyoso ku a dediká e festival di 2017 na Boneiru. Ta un oportunidat pa nos kompartí e echo ku Boneiru ta pionero den área di protekshon di naturalesa akuátiko i hopi popular den buseo.”
“E preservashon di naturalesa i tambe nos kultura tin un prioridat hopi haltu serka nos gobièrnu. Durante e kolokionan ku lo presentá lo bini dilanti ku nos kultura tin influensianan oropeo, afrikano i amerindio. E influensia aki a benefisiá nos ku un ekspreshon kultural úniko den Caribe. E presentashonnan lo bai mustra ku Boneiru realmente ta un perla den Caribe”, e mandatario a trese dilanti den e konferensia.