Kolokionan a hasi impreshon na Cuba Boneiru pionero den konservashon di naturalesa

Kolokionan a hasi impreshon na Cuba Boneiru pionero den konservashon di naturalesa

SANTIAGO DE CUBA – E isla Boneiru ta pionero riba tereno di protekshon i konservashon di naturalesa. E mensahe aki Paulo Bertuol a manda djamars mainta durante e promé dia ku a presentá kolokionan den kuadro di ‘Festival del Caribe’. E tabata e promé orador di Boneiru.
E personanan ku a biaha den e delegashon boneriano pa Santiago de Cuba pa duna kolokio (charla) riba tereno di historia, kultura i naturalesa tabata Sedney Marten, Bob Harms, Paulo Bertuol di STINAPA i Bòi Antoin di FuHiKuBo.
Paulo Bertuol a papia tokante e ròl di pionero ku Boneiru a desplegá riba tereno di protekshon i konservashon di naturalesa. Loke a resaltá ta ku Boneiru tabata e promé isla ku for di un momentu hopi tempran a bini ku leinan di protekshon pa garantisá konservashon di naturalesa boneriano.
Bertuol a menshoná por ehèmpel ku Boneiru for di dékadanan sesenta i setenta a bini ku leinan pa protehá flamingu, lora i tambe piská, introdusiendo prohibishon pa harpuná piská.
Despues turno tabata di Bòi Antoin pa repasá historia di Boneriano. El a kuminsá na e periodo pre-históriko, ku yegada di amerindionan arowak kaketio for di tera firme atraves di Kòrsou promé, siguí pa amerindionan ku a bini direktamente Boneiru for di e teritorio suramerikano. Nan dos a asimilá i na momentu ku spañónan a yega nan tabata habitá e isla.
Antoin mas aleu a papia di époka hulandes, poniendo hopi atenshon na sklabitut, siendo un tópiko ku e hendenan di Santiago gusta hopi. E salida di bonerianonan pa Venezuela, Merka i Cuba pa buska un porvenir mihó tambe a haña atenshon.
Antoin na final, huntu ku Bob Harms, a bini ku un ponensia, ku komo esensia ku si por papia di rekolonisashon di Boneiru dor di Hulanda.