E desishon pa matrimonio entre parehanan di mesun sekso mester keda disidí basa riba un referèndum i no den man di 21 Parlamentario.
E desishon pa matrimonio entre parehanan di mesun sekso mester keda disidí basa riba un referèndum i no den man di 21 Parlamentario.
Aktualmente tin un diskushon amplio na Kòrsou riba e tema di matrimonio de mesun sekso.No ta algu straño mirando e desaroyo nan ku tin mundialmente riba e tema aki, ku Kòrsou no por ekskluí su mes for di e esaki.
E hecho ku nos ta biba den komunidat ku tin su propio kultura , kustumber, historia i dominá pa diferente religion, e tema aki pa hopi di nos den e pais aki ta un tabú den seno di famia i nos komunidat.Pero alabes sorprendente ora mi ta tuma nota ku durante diferente presentashonnan di komedia unda ta trese homoseksualidat dilanti ,sala nan ta yena yen yen i ta opvio ku di e manera aki , si hopi hende ta aseptá esaki Pero den bida real esaki ta keda un tabú ku hopi biaha konsekuensia traumatiko i maltrato físiko i verbal na direkshon di homoseksualnan.
E situashon/sentimentu profundo aki ta trese kuné ku via di referendum ta úniko manera ku mester keda determiná e desishon pa hasi posibel matrimonio entre parehanan di mes un sekso den nos pais i no desishon di 21 Parlamentario.
Pa hopi hende no ta konosí ku na Kòrsou i otro paisnan den Reino ora un parehanan di mesun sekso kasa ku otro na Hulanda,unda esaki si posibel, e akta di matrimonio ta konta pa henter Reino segun nos Statüt art.40 di nos Statüt.Esaki ta nifika ku ya nos sistema ta aseptá esaki indirektamente.
Nos a mira Irlanda , un di pais nan mas katóliko na mundu, unda na aña 1993 ainda homoseksualidat tabata un akto kastigabel , na mei 2015 a bai referendum pa aprobá òf rechasá kasamentu di parehanan di mesun sekso.E resultado tabata realmente sorprendente unda 62% di votadó nan nan a bai di akuerdo ku kasamentu di parehanan di mesun sekso.Na Autrastrlia tambe a husga e mesun mekanismo demokrátiko aki pa tuma un desishon , esta un referendum , unda aki tambe e pueblo a skohe pro kasamentu di parehanan di mesun sekso.Paisnan den Latino Amérika serka di nos , unda e religion katolika ta sumamente fuerte , manera Argentina na 2010 tabata e promé pais ku aseptá kasamentu di parehanan di mesun sekso, sigui pa Uruguay , Brasil i Colombia na 2016.
E realidat ta ku esaki ta un revolushon den mundu inkluyendo Kòrsou.
Resientemente nos hermana isla di Aruba a aseptá e asina yama “geregistreerd partnerschap’ den nan kódigo sivil.Parlamentario sra.Desiree Croes , ku ta e motor inkansabel tras derecho di grupo LBGT bringando pa nan wòrdu trata igual, mester aseptá un “geregistreerd partnerschap” na lugá di matrimonio entre pesonan di e grupo LBGT den Parlamento di Aruba
Mi ta kere ku nos mester saka un lès di esaki i kuminsá dal stap nan chikí den e direkshon aki hasi ku e “geregistreerd partnerschap” (ku ya kaba indirektamente ta posibel) ta wòrdu hinka den nos registro sivil i despues ku sosten di pueblo medio di un referendum, si pueblo ta deseá esaki bini ku matrimonio entre parehanan di mesun sekso.
Saliendo for di un partido ku ta para igualdat, dignidat humano i solidaridat i un famia ku e ser humano semper ta sentral , ta imposibel mi por kontra di derechonan di kualke ser humano.
E diskushon aki no mester bira issue pa hasi polítika kuné , sino un akto di humanidat i igualdat den nos pais.Unda nos ta basa riba un sistema demokrátiko unda mayoria ta konta pero sin pèrdè bista i duna atenshon na minoria den nos pais.Manera Papa Fransico a bisa den avion bayendo bek Vaticano despues di su último biahe na Argentina;”Ken ami ta pa husga ningun hende”, ora nan a puntr’e su opinion riba e asuntu aki.
Giselle Mc William
Parlamentario pa Partido MAN