‘ ATENDE PASAHERO SALIENTE DI VACACION RIBA ‘BOET ATRASA OF BELASTING ATRASA’ TA ABUSO di PODER Y MESTER WORDE PARA !!

BENNY NISBET (PPA):
‘ ATENDE PASAHERO SALIENTE DI VACACION RIBA ‘BOET ATRASA OF BELASTING ATRASA’ TA ABUSO di PODER Y MESTER WORDE PARA !!
Unda cu nos a move durante e ultimo dianan aki ….e topico mas den discussion rond Aruba ta e informacion cu a bin di un comunicado di prensa p/m di Ministerio Publico cu ta informa …cu si un ciudadano ta biaha pa exterior e lo mester paga su boet y belasting prome !!
Shonnan esaki ta un maneho inacceptable y no ta pasa den e cultura politico di pais Aruba !! Cu e por ta na vigor otro caminda hasta na Hulanda kizas…esey lo tin su historia ….pero E no ta acceptable dentro di e cultura di pais Aruba y ta worde considera un abuso di otro mundo.
PPA kier ta masha cla den nos ponencianan al respect.
PPA ta di acuerdo cu pueblo lo mester paga nan ‘boet y belasting’ pero esaki no mag worde mara na salida di un ciudadano cu ta viaja pa sea vacacion of malesa pa exterior. Esaki NO ta acceptable y ta worde considera un abuso pa esnan cu ta gana bon salario ta biba bon y no ta hanja nan mes den e problemanan social cu majoria di nos pueblo ta hanja nan mes.
Na prome lugar si tin un atrazo di ‘Boet’ mester analisa e haltura di e boetnan compara cu e porcentahe di entrada di pueblo riba nos Isla. Como politico mi a ricibi anjas largo ciudadano cu awa na wowo cu tin ‘boet’ pa paga pero cu simpelmente NO tin e entrada pa cumpli cu esaki. Den hopi caso ciudadano ta ricibi judanza diferente caminda pa paga e boetnan aki pasobra simpelmente nan NO por paga esaki. Un 60% di nos pueblo nan entrada di menos cu f. 2500,– pa luna !! Un 50% hasta menos cu salario minimo. Ban tuma un ‘take-home pay’ di un salario minimo cu ta f. 1300,– pa luna y e persona a ricibi un ‘boet’ di f. 300,– florin esaki ta un 25 % di su salario cu normalmente no ta resta mucho of ta resta cu masha sacrificio. Ora un persona asina jega aeropuerto pa e viaha pa exterior y e ta tende cu e tin di paga un ‘boet’ of belasting atrasa esaki ta destrui e persona y su famia…NO por !! Hopi di e grupo aki ta viaha pa ‘exterior’ cu e minimo di placa…. Forza ‘paga boet etc na ultimo momento lo larga e persona sin fondo pa exterior of lo affecta esaki seriamente. Y nos ta bisa esaki pasobra nos sa hopi con hopi ciudadano ta viaha pa exterior cu e ‘minimo’ di fondo cu hopi vez a spaar of a ‘scramble’ serca famia pa logra un viahe….!
PPA ta di opinion cu lo ta bon pa Ministerio Publico analisa e haltura di su ‘boetnan’ den futuro esaki basa riba e realidad na Aruba cu majoria hende ta biba di un salario minimo, pensioen AOV y onderstand/bijstand….cu un porcentaje minimo tin un entrada mas halto. Entodo e maneho anuncia a pone PPA y hopi otro habri wowo pa e realidad aki cu mester worde adapta den futuro na nos humilde opinion.

Pa locual ta trata ‘belasting’ PPA ta di opinion cu Tur hende mester paga nan belasting. Pero na mes momento Pueblo mester ricibi su belasting bek cu a worde dimas paga tambe..! Belasting ta un asunto priva entre e ciudadano y departamento di Belasting di nos pais. PPA no ta sostene cu na Aeropuerto dilanti otro ciudadano cu NO tin nada di haber cu esaki un ciudadano cu ta viaja pa exterior ta hanja tende cu E NO por bai si e no pasa paga un ‘boet/belasting’ prome. PPA No ta sostene e maneho aki den ningun forma. E abuso publico aki y atake contra ‘privacidad’ di e ciudadano No por worde accepta. PPA ta di opinion cu tur ciudadano mester cumpli cu nan deber dentro di e espacio financiero cu nan tin y pa para ciudadano na aeropuerto ta simpelmente un abuso …si otro pais tin esaki esey ta nan asunto pero PPA ta di opinion cu e no ta pas den e cultura arubiano…
Na mes momento ta hopi importante pa tin un evaluacion publico di e haltura di ‘belasting’ cu nos pueblo ta paga …..cu ta mustra di ta un porcentaje halto compara cu otro paisnan.
Comprende bon…PPA ta di opinion cu un pueblo tin di cumpra cu su deber sin embargo PPA ta bon consciente con esnan cu menos entrada a worde trata den curso di tempo door di e varios signatura di gobernacion. Pueblo a worde severamente perhudica locual a crea un ‘pobreza’ enorme den nos sociedad. Y esnan cu tinele un poco miho mes…ta pasa den mal tempo a consecuencia di e pression enorme cu gobierno Eman (AVP) a pone cu nan racha di medidanan. E realidad aki ta pone cu nos sociedad y sigur no PPA lo no bai di acuerdo pa trapa ‘dignidad’ di nos ciudadania na momento cu E kier viaha. Otro ta ora un persona ta bai biba den exterior aki tin un maneho pa anjas kaba !
PPA ta hasi un apelacion publico riba gobierno di Aruba pa pone un paro na e maneho anuncia por medio di e declaracion di Ministerio Publico di nos pais y e asina jama ‘afpakteam’. Y PPA ta declara esaki cu un respet pa e instancia Ministerio Publico di nos pais y e expertonan di e ‘afpakteam’. E realidad sinembargo ta cu e maneho aki ta ‘unfear’ y ta mishi cu e dignidad y den cierto caso e ‘privacidad’ di e arubiano. Un vez mas ‘boetnan y belasting’ e.p. mester worde paga pero esey gobierno NO por bai atende na aeropuerto na momento cu pueblo ta bai viaha.
Anto tur esaki despues di un ‘supermalmaneho’ di gobierno/AVP unda pueblo NO tin ‘arte NI parte’ aden. Esaki NO por y ta hole un abuso di otro mundo !!

Aruba, 5 di juli 2017 Lider Politico di PPA
Benny Nisbet

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: