Otorgando ‘Premio Internashonal Casa del Caribe’ Homenahe na Chai Mercera

Otorgando ‘Premio Internashonal Casa del Caribe’ Homenahe na Chai Mercera

SANTIAGO DE CUBA – Marcel (Chai) Mercera a risibí ‘Premio Casa del Caribe’ djaluna anochi den kuadro di ‘Festival del Caribe’. Esaki a sosodé na ‘Casa de Bonaire’, un edifisio ku Boneiru ta usando komo su sede e siman aki na Santiago de Cuba. Mercera  a sinti su mes sumamente honrá ku e distinshon ku el a risibí.
Tur aña ta otorgá ‘Premio Casa del Caribe’ na personanan di Cuba mes i un artista internashonal ku a destaká den su karera. E artista internashonal aki a resultá Chai Mercera, konosí pa su aktividatnan riba tereno musikal. For di hóben kaba Chai a toka kitara den diferente grupo musikal di Rincon. Aktualmente e ta aktivo den Grupo Watapana.
Gezaghebber Edison Rijna, diputado Nina den Heyer i representante di reino Gilbert Isabella tambe tabata entre e públiko ku djaluna anochi a presensiá e homenahe na Chai Mercera. Tambe por a nota presensia di kònsùl di Hulanda stashoná na Habana señora Valkenburg.
“Mi ta hopi kontentu ku e premio aki”, Chai Mercera a bisa den un diskurso kòrtiku ku el a tene despues di a risibí e premio serka Orlando Vergés, direktor di ‘Casa del Caribe.

This site uses Akismet to reduce spam. Learn how your comment data is processed.

error: Content is protected !!
%d bloggers like this: